Os gandeiros regalan 1.200 botellas de leite fresco en protesta polos baixos prezos

Reparto de leite

Gandeiros reparten desde as 12.30 horas deste martes 1.200 botellas de leite fresco de Arzúa (A Coruña) ante o Centro Comercial das Cancelas, en Santiago, para sensibilizar sobre as ofertas reclamo con este produto. No segundo día das protestas que gandeiros galegos realizan en Santiago polos baixos prezos do leite, os participantes trouxeron unha cisterna até as inmediacións do supermercado Carrefour para regalar este produto aos veciños.

Segundo explicou un dos portavoces da Plataforma en Defensa do Sector Lácteo, Anxo Escariz, con esta acción búscase facer ver aos cidadáns “os problemas” que supón para os gandeiros que se venda en grandes superficies leite por baixo de 65 céntimos.

Neste sentido, Escariz asegurou que por baixo de 65 céntimos “ou non é leite, ou só se usa como gancho para o consumidor”. Así mesmo, a acción quere “lembrar ás papilas gustativas dos cidadáns como sabe o leite cru”, sinalou.

‘DUMPING’

Os gandeiros denuncian que teñen datos de que Carrefour, supermercado que se atopa no Centro Comercial As Cancelas, realiza prácticas de ‘dumping’.

Ademais, Escariz lembrou que Carrefour é unha das compañías que se nega a asinar un acordo por un marco estable durante dous anos para proporcionar prezos dignos aos gandeiros, xunto a outras empresas como Lactalis, Reny Picot e Dia -este martes os gandeiros tamén bloquean un centro loxístico desta compañía no Polígono do Tambre-.

Durante este acto reivindicativo, os gandeiros tamén levaron botellas de leite até os Policías que se atopan na zona, quen non a quixeron coller. Desde a megafonía presente na rúa bloqueada para o tráfico gritouse “Os policías tamén poden levar leite para casa, hai para todos”.