Enviar a un amigo
Opinar
ImprimirO ‘WOSINC’ convertirá Santiago nun único escenario con 40 propostas musicais
Presentación do festival Wosinc
O festival ‘WOSINC’ (Work On Sunday) aspira a converter Santiago de Compostela, por segundo ano consecutivo, “nun único escenario” no que dar cabida a un cartel “ecléctico” que no apartado musical incorpora 40 propostas “arriscadas” de artistas procedentes de 15 países e que son “difíciles de ver”.
De feito, nun elevado número son músicos que actuarán por primeira vez en Galicia, e tamén os hai que ofrecerán o seu primeiro concerto en todo o estado. O “compromiso” con Galicia reflícteo a porcentaxe do 25%, que é o que se reserva para grupos galegos, co obxectivo de trazar unha “ponte” entre o internacional e o propio.
Así explicouno este mércores, en rolda de prensa xunto á concelleira de acción cultural, Branca Novoneyra, o director do ‘WOS’, Iván Arias, quen destacou como novidade nesta segunda edición que a cita suma dous novos espazos, o Salón Teatro e a sala de cinema Numax.
En canto a contido, Arias explicou que do rock e a psicodelia, o cariz dun amplo número de bandas este ano pasa a ser máis experimental e de vangarda, de aí que poidan resultar “máis descoñecidas” para o espectador, ao que, con todo, animou a acudir pola “muchísima calidade” do repertorio.
E, neste sentido, o director do ‘WOS’ adiantou que a venda de entradas “vai mellor que o ano pasado” por estas datas, con case 300 e na véspera dos “días fortes”. Ademais, chamou a atención sobre o feito de que se están a comprar dende lugares como Reino Unido, Italia e Portugal.
“Trátase dun festival diferente e arriscado”, indicou, en relación ao carácter “multidisciplinar” do programa, que inclúe coloquios, oferta audiovisual, artes escénicas e propostas gastronómicas.
PREESTREA DOS ‘FUNGOS’
O festival, que en 2014 tivo uns 1.600 asistentes, arranca este mesmo mércores coa preestrea da película ‘Los Hongos’, en colaboración con Numax.
O seu director, Óscar Ruíz Navia, pertence a unha nova xeración de cineastas colombianos que empeza a destacar no panorama internacional. Xa este xoves, a terraza da Fundación Eugenio Granell acollerá os primeiros concertos, de Sun Araw e Regosanguento.
Del venres 11 ao domingo 13 concéntrase a maior parte do programa, con actuacións de grupos como Bala, Black Bombaim, Cró, Coitelo de Lume, Daniel Knox, Dean Roberts, Ela Orleans, Equations, Girl Band, Lucrecia Dalt, Michel Rother, Miles, My Expansive Awareness, Neno de Elche, No Joy, Not Waving, Noveller, Pálida, Pega Monstro, Pye Corner, Sudakistan, Sun Araw e The Octopus Project, entre outros.
Entre as propostas de artes escénicas, Ignatius Farray, Voltage Opposites Project e Quimera Rosa collective estarán en ‘WOSINC’ nesta segunda edición.
A edila de acción cultural valorou a concepción deste festival, que, segundo dixo, está “en sintonía” coa do goberno municipal, e da que aprecia a “interrelación” de espazos así como a “independencia” e as apostas “innovadoras”.
