O presidente da Comisión de Vixilancia de Pescanova confía en dotar a Pescanova de estabilidade

O presidente da Comisión de Vixilancia de Pescanova, Jacobo González-Robatto, confiou en que a pesqueira, unha vez superada a xunta, avance nos seguintes pasos que establecen os convenios para poder dotar a compañía da estabilidade necesaria. “Dende que Pescanova entrou en crise, o obxectivo principal foi a viabilidade e futuro da compañía, así como os empregos e a sede en Galicia”, subliñou González-Robbato ao termo da xunta xeral de accionistas celebrada este martes.

“Unha vez superada a xunta, solo queda avanzar nos seguintes pasos que establecen os convenios, para así poder dotar á compañía da estabilidade necesaria e libre de continxencias”, afirmou.

González-Robatto solicitou a todos os empregados que sigan traballando coa “máxima dedicación” de forma que a compañía poida cumprir todos os seus obxectivos. “A colaboración de todos, Xunta, Concello, institucións, acredores, accionistas e empregados foi e segue sendo fundamental para apuntalar os últimos pasos do proceso e recuperar o papel de liderado mundial de Pescanova no seu sector”, resaltou.

A xunta de accionistas de Pescanova deu luz verde ao nacemento de Nueva Pescanova, tras aprobar por ampla maioría os proxectos de fusión e segregación, e a ampliación de capital da nova entidade, na que os accionistas ostentarán unha participación do 20%, sen necesidade de desembolso monetario.

En concreto, na xunta extraordinaria celebrada nas instalacións da pesqueira en Chapela, Redondela (Pontevedra), os accionistas aprobaron o proxecto de fusión das filiais, agás Hasenosa, Novapesca Trading e Insuiña, e as posteriores segregacións que dan lugar a Pescanova España e Nova Pescanova.

Así mesmo, deron o visto bo ás dúas alternativas presentadas a votación sobre a ampliación de capital: por un lado, a prevista no convenio, que outorgaba aos accionistas de Pescanova un 5% de Nova Pescanova, cun desembolso de 7,32 millóns para chegar ao 20% e, por outro, a alternativa presentada polos accionistas minoritarios, que contemplaba que a participación fose do 20% sen achega monetaria e cunha achega menor da banca acredora.

Ao ser aprobadas as dúas opcións, prevalece a segunda, posto que se considera unha mellora da proposta inicial e, ademais, obtivo case 2,5 millóns de votos máis. Así, Nueva Pescanova nace cun capital inicial de 3.000 euros e a ampliación de capital levarase a cabo por uns 13 millóns de euros (2,4 millóns procedentes do patrimonio da ‘vella’ Pescanova, e 10,7 millóns dos acredores).