O porto de Vigo converterase na capital do marisco de Europa nas xornadas marisqueiras VigoMar

As instalacións do Porto Pesqueiro de Vigo acollerán, un ano máis, as XIII Xornadas Marisqueiras VigoMar 2015, que terán lugar do 3 ao 6 de setembro. Como sinalou en rolda de prensa o Presidente da Autoridade Portuaria viguesa, Ignacio López-Chaves, que estivo acompañado por Manuel López Garrido, da empresa López Novoa,  Arxentino Pires, de Viveiros de Vigo, e Mariano Martínez, xerente de AHOSVI, o Porto de Vigo será a capital do Marisco de Europa durante esas datas. A organización porá a disposición dos turistas un tren que facilitará o seu traslado até o Porto Pesqueiro e que durante o seu traxecto percorrerá as seguintes rúas: Cánovas del castillo, Carral, Marqués de Valladares, Rúa Pontevedra, Alameda e Arenal.

Os asistentes a esta cita ineludible no calendario das festas gastronómicas nacionais poderán degustar máis de medio centenar de  toneladas de produtos do sector pesqueiro e marisqueiro da cidade nun total de 48 variedades con prezos alcanzables para todos os petos.

A organización espera a asistencia dunhas 80.000 persoas, que poderán degustar os máis de 60.000 quilos de marisco que se porán á venda durante o catro días que durará esta festa gastronómica.

Ademais das degustacións, a organización previu diversas actividades paralelas, como sesións de baile, actuacións folclóricas e de grupos de animación, inchables e xogos tradicionais. 

Este ano debido á crecente afluencia  de turistas portugueses nas edicións anteriores, o sábado día 5 celebrarase  unha xornada especial  dedicada a Portugal, con postos de artesanía e produtos portugueses e actuacións de música tradicional, e contará coa  asistencia de representantes do Corpo Consular de Portugal en Vigo. 

Inauguración oficial

A inauguración oficial das XIII Xornadas Marisqueiras terá lugar o vindeiro xoves, día 3 de setembro, ás 13.00 horas. Nesta ocasión, a lectura do pregón correrá a cargo de Lola Gestido, do Programa  Larpeiros da  Televisión de Galicia.

A Autoridade Portuaria de Vigo colabora con estas xornadas desde o inicio da súa andaina e, como sinalou o Presidente do Porto, con elas ábrese o porto á cidade dentro das propostas que o porto está a realizar para que os vigueses gocen da fronte portuaria.