O Partido Popular defende que ENCE quede na ría e rexeita apoiar a súa saída

Os populares galegos escudáronse de novo en que as “circunstancias” cambiaron para evitar avalar o acordo que alcanzara o Parlamento de Galicia na anterior lexislatura e no que todos os grupos se puxeran de acordo para buscar unha alternativa á permanencia de ENCE na ría de Pontevedra. Así, o PPdeG apelou ao novo marco normativo, que a oposición opina que é un “traxe á medida” -en palabras de Antón Sánchez (AGE)- para os intereses da empresa, para defender que a factoría instalada nos terreos de Lourizán siga máis alá de 2018, cando remata a concesión. Alegou, así mesmo, que se trata de elixir entre o seu “peche” ou a súa permanencia na actual situación.

En fronte, toda a oposición se mostra contraria a que o complexo pastero continúe nuns terreos que, en palabras da deputada nacionalista Ana Pontón, supón “un lastre” para o desenvolvemento doutras actividades na zona, como o marisqueo, o turismo ou a instalación doutras empresas.

O debate, na Comisión de Ordenación Territorial e Medio Ambiente, partiu de dúas iniciativas presentadas pola parlamentaria socialista Patricia Vilán e a do Grupo Mixto Chelo Martínez.

A proposta socialista recolle o xa aprobado na anterior lexislatura, que implicaría “atopar unha nova situación respectuosa co medio; incentivar novos proxectos empresariais que permitan pechar o ciclo produtivo do papel de Galicia; impedir calquera tipo de instalación de carácter complementario vinculado ao complexo de ENCE; e modificar o plan de ordenación do litoral”.

“NON RESPECTA OS ACORDOS”

Na súa defensa, a deputada do PSdeG lamentou que o PPdeG “non respecte os acordos” alcanzados no Parlamento. “Fan caso omiso do que se decide”, acusaron, ademais de reprochar que “enganasen” aos cidadáns cando dixeron que estaban a favor do traslado da factoría porque, naquel momento, lles “conviña”.

Así mesmo, referiuse ao argumento dos postos de traballo para asegurar que “resga un pouco que sexan adaís dos traballadores”, despois da súa reforma laboral, e recordou que en 2008 e 2009 o PP xa falaba de “crise” económica, malia o que votou a favor da saída da ría.

Pola súa banda, a deputada Chelo Martínez denunciou a “hipocrisía” do PPdeG, a quen acusou de “presentarse en defensa dos intereses” dos galegos, pero a quen en realidade actúa para “esconder a súa propia corrupción”.

Pontón resaltou a necesidade de “desenvolver un modelo sostible” e “non ter un futuro hipotecado por unha empresa”, sobre o modelo forestal; mentres que Antón Sánchez augurou que o PP “vai pasar por enriba de toda” sentencia, polo que “a única solución é que non teña o poder” despois das eleccións.