O Obradoiro amplía o desconto para abonados nas entradas do partido de presentación

O Rio Natura Monbus Obradoiro amplía até o 30 de setembro o prazo para que os abonados poidan retirar a súa entrada do partido de presentación en Sar ante o F.C. Porto a só 5 euros. Así, todos eles terán até fin de mes para comprar a entrada do seu asento a este prezo reducido, seis días máis dos indicados anteriormente. O encontro terá lugar o domingo 4 de ocrubre ás 19.00 horas.

O partido ante os lusos será o evento central do XLV Aniversario do club, e nel convidaranse a ex adestradores, ex xogadores e ex directivos, xuntando sobre a pista no descanso a diferentes xeracións obradoiristas. A recadación deste partido, irá destinada integramente á Fundación Heracles, encargada do desenvolvemento da canteira do club. 

Os pases pódense adquirir tanto mediante www.obradoirocab.com como en oficinas, e até 30 de setembro tamén os menores de 18 anos terán este prezo reducido. Os Amigos da Fundación Heracles, pola súa banda, poderanas adquirir a este prezo indefinidamente. A partir do 30 de setembro, o prezo xeral será de 12 euros en calquera dos sitios dispoñibles.