O Fontes do Sar prepárase para o partidazo da xornada

Santiago Futsal prepárase para recibir a Magna Gurpea no partidazo da 2ª xornada de Liga e que será televisado en directo polas cámaras de Teledeporte (Sábado, 13h). Para esta ocasión, o primeiro partido da tempada 15/16 no feudo compostelán, o equipo quere contar co apoio de todos os seus afeccionados e sentirse arroupado na súa estrea ligueira no Multiusos Fontes do Sar.

Para que o Multiusos Fontes do Sar sexa o sábado unha festa, cada abonado maior de 18 anos do Santiago Futsal poderá acceder cun acompañante non socio de maneira gratuita. O acceso, tanto de abonados como de acompañantes, realizarase polo hall principal do pavillón.

 De igual modo, os prezos das entradas para o devandito encontro mantéñense en 10€ a entrada de adulto, 5€ a de menores de 13 a 17 anos e 2€ para menores de 13 anos. As entradas poñeranse á venda en taquilla o día do partido a partir das 12h. Así mesmo, tamén se poderán comprar na oficina do Santiago Futsal durante toda a semana en horario de 10h a 14h e de 16.30h a 19h.

Ademais, no descanso do partido, terá lugar unha homenaxe a ‘Farruco’, director do centro Don Bosco, gran promotor de encontros para o traballo xuvenil e de accións a nivel social. Por motivos de traballo, o activista social galego desprazarase a Madrid e o club quere renderlle unha homenaxe de despedida.

E se aínda non renovaches o teu abono do Santiago Futsal, estás a tempo de facelo para este primeiro partido de Liga en casa. Podes renovar o teu abono ou darte de alta como novo abonado nas oficinas do Santiago Futsal (Multiusos Fontes do Sar) en horario de 10h a 14h e de 16.30 a 19h.