O detido en Vigo pola morte da súa parella permanece en comisaría

O home de 31 anos detido na noite do domingo tras entregarse en comisaría pola morte da súa parella sentimental permanece este martes en dependencias policiais á espera de prestar declaración. Segundo informaron fontes policiais, o arrestado, veciño de Vigo, previsiblemente declarará este martes en sede policial. O luns estaba á espera da chegada do seu avogado para facelo.

A falecida é unha muller de 46 anos natural de Brasil que morreu supostamente por golpes propinados polo que era a súa parella sentimental. O Tribunal Superior Xustiza de Galicia confirmou que non había denuncias previas.

Fontes policiais apuntaron que veciños da céntrica rúa López de Neira onde sucederon os feitos indicaron á Policía Nacional que a vítima exercía a prostitución e recibía a clientes na vivenda.

Ademais, sinalaron que o home e a falecida, que mantiñan unha relación aproximadamente desde facía un ano, protagonizaban discusións, segundo indicaron as mesmas fontes, supostamente por celos.

Os feitos ocorreron sobre as 20,00 horas deste domingo, cando un home se personou en comisaría para entregarse pola morte dunha muller. Ao mesmo tempo, familiares da falecida puxéronse en contacto cos servizos de emerxencia, que foron quen atoparon o seu corpo.