O delegado do Goberno sinala que o rallye da Coruña contaba con todas as autorizacións

O delegado do Goberno en Galicia, Santiago Villanueva, apuntou que o rallye da Coruña no que se produciu o accidente dun vehículo, que provocou o falecemento de sete persoas e varios feridos, tiña todas as “autorizacións” necesarias para a súa celebración. Ademais, apostou por analizar as condicións de seguridade deste tipo de carreiras.

En declaracións ao medios tras a toma de posesión dos novos membros do consello de contas, Villanueva recordou que as dilixencias permanecen abertas por unha dobre vía. Por un lado, o atestado da Garda Civil de Tráfico, no que se trata de descubrir as causas do accidente e as “posibles situacións que se produciran”.

Así, os efectivos deste corpo de seguridade encárganse agora da análise do coche, a análise da velocidade e do estudio da propia vía.

Por outro lado, atópanse as actuacións da Policía Xudicial da Garda Civil, que xa iniciou a toma de declaracións ás testemuñas do accidente e que, xunto co anterior, completará o atestado do sinistro. Unha vez que estea rematado, será remitido aos xulgados.

REFLEXIÓN MEDIDAS DE SEGURIDADE

Nas súas declaracións, Villanueva tamén se mostrou partidario de, “entre todos”, levar a cabo unha “análise” das medidas de seguridade, a través dos distintos expertos que poidan traballar en comisión é para estudar as causas.

O delegado do Goberno, en relación á situación do piloto, recordou que se trataba dunha proba deportiva, polo que “non hai límite de velocidade” e non se trata dun “accidente de tráfico”.

“Agora toca analizar o accidente”, resaltou o representante do Executivo central en Galicia. E, engadiu, se se poden adoptar “outras medidas” de seguridade, que se “tomen”.