O Concello de Bueu aproba a ordenanza de taxi

No primeiro pleno tras a volta da temporada estival, a corporación municipal de Bueu aprobou definitivamente a nova ordenanza de regulación do servizo de taxis, tras estudarse as alegacións presentadas polas asociacións e o Partido Popular. Esta ordenanza, que foi aprobada con todos os votos a favor excepto a excepción de SON, establece que non se poderá contratar o servizo fóra das paradas a menos de 100 metros, e tamén establece a obrigatoriedade do taxímetro, co que se pretende solucionar parte dos problemas entre os autopatronos. Así mesmo, e segundo unha petición do Partido Popular, o goberno liderado por Juncal tamén vai esixir un certificado cada ano de que os taxistas están ao corrente nos pagos á seguridade social, medida que se vai propor como unha resolución de alcaldía. Con esta aprobación, o alcalde mostrouse satisfeito porque “se preste un servizo público coas máximas garantías aos cidadáns”.

Na sesión plenaria, que tivo lugar onte ás 21 horas, tamén se aprobou unha bonificación para os vehículos híbridos,  petición presentada nunha moción do PP xunto coa bonificación aos vehículos históricos. Tras un intenso debate, os grupos acordaron por unanimidade aprobar a bonificación dos híbridos, porque a dos históricos xa se contemplaba con anterioridade.

En canto ao alugueiro dun local para destinar a oficinas municipais, levado a pleno por segunda vez, volveuse declarar deserto. Aínda así, Juncal adiantou que se levará ao seguinte pleno por terceira e última vez cos mesmos pregos, xa que teñen expectativas de que alguén se vai presentar e non o fixo antes pola falta de tempo.

Tras unha moción do PSOE sobre a revisión catastral que non se tratou porque o portavoz preferiu que se tratase antes en comisión informativa, os grupos adoptaron unha proposta conxunta para instar a Portos, Aduanas e Repsol a fornecer ao porto de Bueu dun surtidor de combustible para barcos. A iniciativa foi tomada a raíz dunha petición do 27 de marzo da Asociación de Embarcacións Deportivas da 7ª Lista Robaleira, e a corporación decidiu apoiar e facer as xestións precisas para que se consiga o surtidor.