O Concello da Coruña defende un cambio profundo na FEMP

O alcalde da Coruña, Xulio Ferreiro, participou este sábado en Madrid no XI Pleno da Federación Española de Municipios e Provincias (FEMP), onde se abstivo na votación que elixiu presidente e, xunto a outras cidades, asinou un comunicado moi crítico co funcionamento actual da entidade, “que precisa un cambio de rumbo que a converta nunha ferramenta realmente útil para os concellos e a súa cidadanía”. “Esa mudanza debería comezar polos propios Estatutos da FEMP, que agora blinda o bipartidismo de PP e PSOE”, indicou o rexedor coruñés.

A Coruña, xunto a outras cidades como Barcelona, Madrid, Santiago, Ferrol ou Cádiz, asinou un documento crítico coa actual FEMP no que se lembra que despois das últimas eleccións xurdiron novos espazos de colaboración municipalista, nos que os concellos firmantes se comprometen a profundar.