O Clube de Atletismo Corredoiras celebra o I Acuatlón Santa Ifigenia na Banda do Río

O Clube de Atletismo Corredoiras, coa colaboración da comisión de festas de Banda do Río e o Instituto Municipal de Deportes de Bueu, celebran mañá o I Acuatlón Santa Ifigenia. A proba tomará a saída na zona do paseo marítimo da Banda do Río, tanto para as probas de natación como para a carreira a pé, para as que contarán cunha embarcación e apoio. E é que, segundo apuntan desde a organización, o Acuatlón é un deporte combinado e de resistencia no cal o atleta realiza dúas disciplinas en tres segmentos: natación, carreira a pé e natación. Esta actividade, destinada a nenos e nenas de entre 9 e 14 anos conta con 41 inscritos, dos cales dez son de categoría benxamín (entre 9 e 10 anos), quince na de alevín (entre 11 e 12), e dezaseis de infantil (entre 13 e 14 anos).

O horario de saída será ás 11 para benxamín, ás 11.30 horas para alevín e a partir das 12 horas para infantil. A partir deses horarios, os participantes farán un primeiro segmento de 250 metros nadando, outro de 500 metros correndo e outros 250 nadando.

A entrega de gorros numerados será na Banda do Río ás 10 horas, e será obrigatorio presentar a autorización asinada polo pai, nai ou titor de cada menor.