O Burela enfróntase ao Palma Futsal na segunda xornada da Primeira División

O Burela Pescados Rubén desprázase a Palma de Mallorca para disputar a segunda xornada da Primeira División ante o Palma Futsal, venres 18 a partir das 20.30 horas. O duelo entre galegos e baleares dispútase no pabellón de Son Moix que é un feudo moi complicado e onde “o Palma Futsal suma o apoio da súa afección á súa calidade como equipo” manifestou o técnico laranxa Daniel Ibañes. Para o adestrador burelao a xornada preséntase “cunha esixencia máxima xa que estamos ante un equipo punteiro da Liga Nacional de Fútbol Sala, manteñen o bloque da tempada anterior na que realizaron un excelente papel e cos reforzos configuraron un plantel amplo e de calidade. Será complicado conseguir a vitoria pero nós estamos traballando ben e, evidentemente, imos coa intención de dar a sorpresa. Confiamos nas nosas opcións”.