O alcalde de Santiago confirma a saída dos tractores

O alcalde de Santiago, Martiño Noriega, confirmou este venres que a saída dos tractores que permaneceron ao longo desta semana en distintas entradas e vías da capital galega se irá facendo ao longo desta xornada de forma “graduada” e por diferentes traxectos. Preguntado na rolda de prensa posterior á xunta de goberno, Noriega indicou que lle transmitiron que se preparou “un dispositivo de acompañamento” para a saída dos gandeiros, se ben non ofreceu demasiados detalles ao respecto.

O que si fixo é agradecer o “intenso” traballo tanto da área municipal de Convivencia como dos corpos de seguridade ao longo desta semana de tractorada, pois son moitos os que tiveron que “dobrar quendas” e demostrar o seu “bo facer” para “minimizar” o impacto da protesta na cidade.