O alcalde da Coruña insta a Feijóo a non usar a Xunta como arma de partido

O alcalde da Coruña, Xulio Ferreiro, instou o presidente da Xunta, Alberto Núñez Feijóo, a non utilizar a Xunta “como unha arma de partido” tras mostrar a súa vontade de “cooperación” institucional tanto coa Administración autonómica coma co resto de cidades galegas. “Xa está ben de enfrontar unhas cidades con outras”, sinalou durante a súa intervención nos almorzos ‘Fórum Europa. Tribuna Galicia’ e ao formular a necesidade de abordar cuestións como o sistema aeroportuario galego.

Mentres, tendeu a man aos grupos da oposición para alcanzar acordos na cidade, debido ao goberno de minoría da Marea Atlántica. “Vémonos abocados a pactar e iso é unha responsabilidade compartida”, insistiu o rexedor despois de que no último pleno os socialistas non avalasen a súa proposta de modificativo de crédito, o que impediu a súa aprobación.

Na súa intervención, fixo balance tamén destes primeiros cen días de goberno e avanzou algúns dos proxectos en marcha. Así, sinalou que “antes dun mes” haberá cambios na supresión da simboloxía franquista. “Pouco a pouco”, respondeu ao ser interpelado sobre esta cuestión.

PLAN DE EMPREGO E RENDA MUNICIPAL

Na mesma liña, dixo que o próximo luns presentarán aos axentes económicos e sociais da cidade o borrador dun plan de emprego -ámbito no que avogou por aproveitar unha institución como a universidade- e “nunha ou dúas semanas” aos grupos da oposición un borrador sobre o seu plan de renda municipal para os colectivos máis desfavorecidos.

Ferreiro, que precisou que “máis da metade” das 25 medidas que anunciaron para os cen primeiros días de goberno están en marcha, sinalou tamén que traballan nas ordenanzas fiscais que suporán “unha rebaixa da auga” ou no borrador do plan de erradicación dos asentamentos precarios, que presentarán primeiro “aos veciños afectados”.

A MARIÑA E FACHADA MARITIMA

Sobre as obras da Mariña, reiterou que seguen as conversacións coa Autoridade Portuaria, á que requiriron documentación, “porque no concello non consta proxecto de obra”, insistiu.

En canto ás súas negociacións co Ministerio de Fomento sobre as actuacións nos muelle de Calvo Sotelo e Batería, dixo que haberá que preguntarse -ante a previsión que había de venda destes para a construción de edificios- “se se incrementa a edificabilidade ou se recupera -esta fachada marítima- para a cidade”

O CONCELLO, “UN PRESTIGE

Na súa intervención, admitiu que estes meses de goberno foron “un desafío” pola entrada “de xente común na política institucional”. Ademais, dixo que se atoparon unha administración municipal “lastrada por déficits de xestión”.

Por iso, comparou o Concello cun petroleiro. “A cidade é como un Prestige que leva un rumbo de décadas e ese rumbo non se cambia nun día”, admitiu Ferreiro, quen sinalou que as iniciativas da Marea “terán o seu froito a medio e longo prazo”.

“Non se dá un volantazo ao chegar porque iso conduce ao desastre”, engadiu o rexedor en resposta ás críticas da oposición, que cualificou de “decepcionante” a súa xestión.

Ferreiro, que remarcou que, dende a súa chegada ao goberno, leva “máis de 500 citas e entrevistas”, insistiu na súa vontade de “recuperar a política no sentido nobre”. “Somos o que parecemos”, subliñou.