Martiño Noriega ve luz ao final do túnel para a intermodal de Santiago

O alcalde de Santiago, Martiño Noriega, ve “luz ao final do túnel” para que leve a cabo a estación intermodal -de tren e autobús- tras a reunión mantida con responsables do Ministerio de Fomento en Madrid, que lle trasladaron que o anteproxecto desta infraestrutura -que elabora Ineco- estará listo este ano, e neste estudo poderá facer achegas o Concello.

No grupo de goberno existía temor de que tras a primeira fase de obras que se acometerán até 2018 por uns 19 millóns de euros, na que se acondicionará a estación de tren á alta velocidade, non levase a cabo a intermodal, pero o Ministerio de Fomento mostrouse “sensible” e con “boa receptividade” ás demandas do Concello.

Con todo, a intermodal segue sen ter prazos concretos para facerse nin financiamento pechado. Respecto diso, o concelleiro de Espazos Cidadáns, Jorge Duarte, deixou claro que “non é a forma idónea de traballar” que o Ministerio de Fomento vaia a acometer unha primeira fase de obras até 2018 sen ter en conta un proxecto global, e admite que considera “preocupante” a indefinición de tempos.

Entre as prioridades do Goberno local de Compostela Aberta atópase o traslado da estación de autobuses á beira do tren, para o que se deberá abrir unha senda peonil desde o Hórreo que permita acceder de forma directa á dársena de buses por encima das vías férreas, a cal tamén permitirá conectar co barrio de Pontepedriña.

Neste sentido, lembra que a Xunta ten a obrigación de empregar fondos europeos entre 2018 e 2020 para o traslado da estación de autobuses até as inmediacións da de tren, á vez que iso permitiría á Administración galega “pechar” o complexo de San Caetano co espazo que quedará na actual localización da estación de buses.

CONXO E LIGAZÓNS DA AP-9

Así as cousas, tras a reunión con responsables de Fomento, na que estivo presente a ministra, Ana Pastor, Martiño Noriega afirmou que non se pode negar a maior de que se tivo receptividade” por parte deste departamento, por iso cualifica de “positivo” o encontro.

Neste sentido, o Ministerio de Fomento trasladou ao Concello o compromiso de que se cumpra o prazo para que estean acabadas as obras da rotonda e paso inferior de Conxo, que se mantén no 31 de decembro deste ano.

Respecto diso, Duarte explicou que se trasladou a Fomento que os veciños consideran unha “tomadura de pelo” o lento ritmo ao que avanzan as obras, pero o departamento garantiu que se pedirá ao contratista un “maior esforzo” en persoal e dedicación. E é que, segundo o concelleiro, “ou se cambia o ritmo ou é imposible” acabalas en tempo.

No tocante ás ligazóns da autoestrada AP-9, despois de que o Ministerio de Fomento aprobase a pasada semana o proxecto de conexión coa autovía a Lugo (A-54), denominado orbital, expúxose a necesidade de que o Goberno central realice conexións coa estrada N-550 e cos polígonos industriais da Sionlla e de Ou Tambre.

Tamén indicou Duarte que Fomento mostrou a súa disposición a cometer unha ligazón da AP-9 coa Cidade da Cultura, en cuxo proxecto traballa a Xunta. Sobre este extremo, chamou a atención sobre a importancia desta actuación para mellorar a conexión entre os barrios de Sar e Fontiñas, así como para alixeirar o tráfico da cidade, posto que permitiría conectar a zona que vai desde A Rocha até a localización de Finsa na N-550 sen peaxes.

“OPTIMISTA” COA POLÍTICA AEROPORTUARIA

Noutra orde de cousas, a preguntas sobre o billete combinado de bus e tren para acceder ao tres aeroportos galegos, Martiño Noriega dixo que o ve “positivo”, pois “facilita o fluxo” de viaxeiros.

Así mesmo, dixo mostrarse “optimista” en que poida haber unha mellor colaboración en materia aeroportuaria entre o tres cidades, co fin de acabar coa política “de competición” dos últimos anos.