Máis de 5.000 persoas maniféstanse polas rúas de Lugo en demanda de prezos xustos para o leite

Máis de 5.000 persoas marcharon este xoves polas rúas do casco histórico de Lugo para esixir “prezos xustos” para o sector produtor de leite, detrás dunha pancarta a única mensaxe da cal era ‘A unión fai a forza’, slogan dos gandeiros da provincia que decidiron organizarse á marxe dos sindicatos. Esta manifestación produciuse de forma simultánea á reunión que celebra en Madrid a ministra de Agricultura, Isabel García Tejerina, con representantes da produción, a industria e a distribución para pactar unha solución á problemática dos baixos prezos en orixe.

Ao remate da mobilización, á que asistiron produtores de León en dous autobuses e tamén de Asturias, os gandeiros repartiron cun dispensador leite “da de verdade” aos participantes, na Porta Falsa de Lugo.

Ás 15,00 horas celebrarán unha asemblea para decidir sobre as accións futuras a desenvolver, en base do resultado da reunión de Madrid.

O voceiro dos gandeiros, Roberto López, insistiu en que manterán as “medidas de presión” en caso de que “non haxa un compromiso por escrito”, tal e como acordaron este mércores nunha reunión en Santiago con membros da OPL de Santa Comba (A Coruña).

En caso de non haber acordo, “barállase a opción ir a centrais lácteas”, se ben López non o confirmou “de momento” porque os gandeiros, dixo, prefiren “esperar a que se comunique oficialmente o resultado da reunión”.

Este xoves cúmprese unha semana dende que os produtores lugueses acordasen manter as mobilizacións máis alá dos horarios da ‘tractorada’ convocada pola Plataforma en Defensa do Sector Lácteo na cidade da muralla.

Nos últimos días sumáronse decenas de gandeiros a esta protesta e máis dun millar de tractores invaden a Rolda da Muralla e outras zonas da capital lucense por sétimo día. “Nós queremos levantar a manifestación, seguir bruando as vacas e volver traballar no campo, que é o noso traballo”, defendeu López.

Antes de arrancar a manifestación, o líder desta marea de gandeiros fixo unha “valoración positiva” desta semana e mostrouse “orgulloso” de “unir tanta xente sen unha bandeira, solo co compromiso de loita polo prezo do leite”.

Así mesmo, reiterou os agradecementos á cidadanía lucense, en tanto que “todo o mundo está a apoiar” e ás empresas “que se involucraron”.

INTERVENCIÓNS

Unha gandeira de Lugo, da parroquia de San Xoán do Campo, advertiu de que “ou toman medidas ou van eles detrás, isto é todo unha cadea: veterinarios, industria, etcétera”. Outro gandeiro engadiu que “ten que saír algo” da cita madrileña ou “senón pechará o setenta por cento das explotacións”. “Imos seguir, isto non pode parar”, sentenciou. Chegado da Coruña, de Aranga, outro gandeiro avanzou que están dispostos a “ir ás centrais de leite e algunha administración” porque “isto non vai quedar aquí”.