publicidade hoxe
Publicidade
omeulibro1

Máis de 3.000 tractores colapsan as rúas de Santiago

PUBLICADO EN: Noticias de GaliciaLocal PortadaSantiago de Compostela
A-
A+
Europa Press
Tractores nas rúas de Santiago

Tractores nas rúas de Santiago

Máis de 3.000 tractores, segundo cifras da organización, colapsan este luns Santiago de Compostela cunha masiva protesta para reclamar que se pague un prezo xusto aos gandeiros galegos polo seu leite e se tomen medidas políticas urxentes ante a súa “dramática” situación.

Con máis de dúas horas de atraso, pasadas as 14,00 horas, comezou unha tractorada que a Plataforma en Defensa do Sector Lácteo define como “histórica” e á cal acudiron miles de vehículos agrarios chegados de diversas zonas leiteiras como Arzúa, Carballo, Ordes, Santa Comba e Silleda, entre outras.

A protesta bloqueará algunhas das rúas principais da cidade como San Caetano (ante a sede da Xunta), Galeras, Romero Donallo e Rodríguez de Viguri, co fin de formar un cordón circular duns 10 quilómetros que acabe na saída (Salgueiriños), o cal bloqueará a capital galega tras crear problemas de tráfico en varias das entradas ao longo da mañá.

Así, os tractores circulan a un ritmo moi pausado, con diversas paradas e facendo soar as súas bucinas, polo que a marcha pode durar até a noite deste luns. De feito, a cabeceira da manifestación comezou a pasar por Galeras ás 15,35 horas (quilómetro 3 do percorrido) ocupando os dous carrís, polo que as columnas de vehículos avanzan a un ritmo aproximado de dous quilómetros por hora.

A marcha ábrea un tractor cun cartel que reza ‘A vaquiña polo que vale’, e nesta xornada reivindicativa pódense ler lemas como ‘Prezos xustos non leite para todos’ e ‘O campo está en loita’. Un dos participantes leva un remolque no que se pode ver a un gandeiro aforcado á beira dun rótulo que avisa de que ese será “o futuro” dos produtores “cun prezo do leite a 18 céntimos”.

FOLGA DE ENTREGAS SE NON HAI SOLUCIÓNS ESTA SEMANA

Esta protesta faise no mesmo día que se reúnen os ministros de Agricultura en Bruxelas, a quen o secretario xeral de Unións Agrarias, Roberto García, demandou que saian cun acordo para que se suban os prezos de intervención” do leite, así como que se arbitren medidas de intervención.

Así mesmo, en declaracións aos medios, García advertiu de que se o vindeiro xoves o Ministerio de Agricultura non ofrece medidas concretas ao sector, como garantir prezos mínimos para o leite, iniciarase unha folga de entregas a partir do día 12 deste mes.

Sobre este extremo, García remarca que “o gandeiro galego non pode esperar como o asturiano a que haxa un acordo dentro de dous meses”, senón que “xa” esta semana tense que garantir que “todos os contratos lixo” por baixo de custos de produción “retíranse” e a partir do 1 de outubro haxa novos contratos que conteñan de forma obrigatoria que non se pode pagar por baixo deses prezos.

Nesta liña, o secretario xeral de Asaja Galicia, Francisco Bello, demandou que “dunha vez por todas se recupere o prezo do leite”, cun acordo que “dea estabilidade no tempo”. “E se non chega, haberá que seguir loitando”, avisou.

Pola súa banda, a líder do Sindicato Labrego, Isabel Vilalba, chamou a atención sobre a situación “desesperada” dos gandeiros, polo que esixe medidas inmediatas que pasen pola figura dun mediador que poida tomar decisións vinculantes e a retirada de excedentes lácteos que baixan prezos.

Ademais, Elías Somoza (Fruga) pide que se estableza un acordo “á francesa” de prezos mínimos, á vez que cre que xa é hora de que o presidente da Xunta, Alberto Núñez Feijóo, “vaia dicindo algo”.

“SE TEMOS QUE MORRER, IMOS A MORRER DE PÉ”

“Se temos que morrer, imos morrer de pé, a actual situación é insustentable un só mes máis”, desta forma resumiu Roberto García a decisión dos gandeiros de ir até o final coas protestas e iniciar unha folga de entregas se non hai solucións inmediatas.

E é que os gandeiros galegos claman porque cobran uns dous céntimos menos polo leite que os asturianos e entre cinco e sete céntimos menos que os andaluces, á vez que en Galicia un 30% dos produtores xa está a vender por baixo do que lles custa producir.

De feito, as últimas cifras oficiais do mes de xullo mostran como o prezo en Galicia está en 27,6 céntimos, mentres o resto de comunidades supera os 30 céntimos o litro.

PRINCIPAIS LÍDERES DA OPOSICIÓN CONTRA FEIJÓO

Na protesta, que arrincou de Salgueiriños, estiveron presentes os principais líderes da oposición en Galicia, así como alcaldes de comarcas leiteiras, que acusan o presidente da Xunta, Alberto Núñez Feijóo, pola súa falta de medidas para o sector.

A este respecto, o secretario xeral do PSdeG, José Ramón Gómez Besteiro, cargou contra a “absoluta falta de liderado” da Xunta para defender os intereses dos gandeiros “en Madrid e na UE”, e critica que Alberto Núñez Feijóo “non se ten que esconder”. Por iso, demanda “unha intervención clara política” para que non haxa unha “ruína económica” do sector.

Pola súa banda, o portavoz nacional do BNG, Xavier Vence, urxiu unha vez máis unha solución “de calado” para un sector que, segundo asegurou, “se desangra”, á vez que recriminou a falta de liderado de Núñez Feijóo.

Nesta liña, o coordinador de Anova e deputado de AGE, Antón Sánchez, criticou que “mes e medio despois” segue sen haber medidas “efectivas das administracións” en apoio dun sector estratéxico para Galicia.

PROTESTA DE LUGO E ATÉ O XOVES EN SANTIAGO

Esta tractorada de Santiago prodúcese mentres centenares de gandeiros permanecen rodeando a muralla de Lugo desde o pasado xoves, despois de que un grupo dos manifestantes decidisen manter a súa protesta.

Sobre esta cuestión, Anxo Escariz, un dos portavoces da Organización de Produtores de Leite (OPL), mostrou o seu apoio aos gandeiros que seguen en Lugo, pero considera que están “equivocados” permanecendo na cidade amurallada, porque cre que hai “un intento” do PP por dividir ás manifestacións.

Deste xeito, tras un mes de agosto marcado por tractoradas en diferentes localidades leiteiras galegas como Santa Comba ou Vilalba, este luns inícianse en Compostela catro xornadas reivindicativas nas que haberá protestas ante centro comerciais (martes), unha concentración con tractores ante a Xunta (mércores) e unha manifestación a pé desde a Alameda (xoves), que culminará de novo ante a sede do Goberno galego.

7 de setembro de 2015 | 16:42 • Sen comentarios

Comentarios pechados.