López-Chaves mostra a súa preocupación por non poder presentar a 2ª terminal nunha das feiras máis importantes de cruceiros

O Presidente da Autoridade Portuaria de Vigo, Ignacio López-Chaves, regresou dunha das feiras máis importantes en canto a tráfico de cruceiros refírese, a ‘Seatrade Europe Cruise Shipping Convention’, que se celebrou a semana pasada en Hamburgo (Alemaña), con preocupación.

Segundo avanzou en rolda de prensa, o sector de cruceiros, con quen mantivo diversas reunións ao longo dos tres días que durou a feira, lamentou que ‘algúns gobernos municipais poñan trabas a este tráfico; sobre todo, tendo en conta os bos datos económicos e a imaxe que supón este tipo de tráfico para a cidade’, lembrou.

López-Chaves, recibiu esta queixa como un ‘xerro de auga fría’ para a terminal que preside, froito da que considera unha ‘mala política’ exercida desde ‘algúns gobernos municipais’, polo que mostrou a súa ‘preocupación’ respecto diso. ‘Non puidemos presentar novidades en Hamburgo e esta imaxe que estamos a dar non é boa’, lamentou en referencia ao boicot por parte do Alcalde de Vigo, Abel Caballero, ao proxecto de segunda Terminal de cruceiros prevista nas antigas naves da froita e que o Goberno municipal paralizou. 

Segundo asegurou o máximo responsable portuario, aínda que o sector dos cruceiros ‘está a medrar moito no Extremo Oriente, nós seguiremos pelexando por situar máis barcos no noso porto e, para iso, necesitamos a segunda Terminal nunhas condicións óptimas de seguridade e operatividade’. 

‘Se estamos a cumprir co que nos dicían, que non nos impidan facer a segunda Terminal’, declarou, xa que este boicot por parte do Goberno municipal ‘impediunos levar a cabo unha campaña de promoción moi importante en Hamburgo’, lamentou. ‘Vigo si quere os cruceiros, aínda que pareza que algúns non os queren’, concluíu. 

Nova escala

Mentres o Presidente portuario facía estas declaracións, a Estación Marítima recibía hoxe unha nova escala, a do ‘Azura’, con preto de 4.200 persoas a bordo, entre pasaxe e tripulación.

Procedente de Southampton (Gran Bretaña), chegou ao Peirao de Transatlánticos ás 08.15 horas, onde permanecerá até as 16.30h., momento no que porá rumbo a Lisboa (Portugal). A bordo viaxan un total de 3.044 pasaxeiros de 18 nacionalidades distintas, na súa maioría británicos (3.001 pax.) e 1.153 tripulantes.

Este cruceiro, dos máis habituais en Vigo durante os últimos anos, pertence á naviera ‘P&O Cruises’. Construído por Fincantieri, nos seus estaleiros de Monfalcone (Italia), é o barco irmán do ‘Ventura’.

A súa construción iniciouse en 2008, cando a súa quilla foi posta oficialmente. A entrega oficial do cruceiro a ‘P&O Cruises’ levou a cabo dous anos despois, en 2010, e a súa viaxe inaugural tivo lugar precisamente ese ano, cando saíu dos estaleiros de Fincantieri en ruta a Southampton.

Este buque é o maior da naviera ‘P&O Cruises’, xunto ao seu xemelgo ‘Ventura’, con 290 metros de eslora e 36 de manga. Dispón de 1.557 camarotes, distribuídos en 14 cubertas, co que pode albergar até 3.597 pasaxeiros e algo máis de 1.200 tripulantes. 

Este megacruceiro de última xeración, conta con todas as comodidades e diversos servizos exclusivos como, por exemplo, un ximnasio con vistas submarinas, spa de augas termais, un gran auditorio con espectáculos de teatro e malabares e un cine ao aire libre na cuberta superior.

Tamén ten o primeiro restaurante flotante distinguido cunha estrela Michelin, ‘The Glass House’, que conta co asesoramento do chef Atul Kochhar, propietario do exclusivo restaurante londiniense ‘Seventeen’.

O ‘Azura’ visitará o Porto de Vigo até en 8 ocasións ao longo desta tempada, deixando na cidade a máis de 34.400 persoas. 

Xunto a el, a Estación Marítima recibirá tamén aos seus outros irmáns: o ‘Oceana’, o ‘Oriana’, o ‘Arcadia’, a ‘Aurora’, o ‘Ventura’ e o ‘Brittania’, pertencentes á emblemática naviera P&O. Entre eles, deixarán en Vigo máis de 86.000 pasaxeiros nun total de 30 escalas, fronte aos preto de 13.000 pasaxeiros rexistrados en 2014 nas 6 escalas realizadas ao longo dese ano polos buques da naviera.