Galicia amosa o seu potencial no sector da planta ornamental en “Iberflora”

Galicia está presente na feira Iberflora de Valencia cun espazo expositivo de 384 metros cadrados no que están representadas 10 empresas galegas do sector da planta ornamental. A directora xeral de Produción Agropecuaria, Patricia Ulloa, visitou esta mañá o certame para apoiar coa súa presenza a promoción das producións primarias de Galicia presentes neste evento, considerado o referente profesional deste eido en toda Europa.

Neste contexto, Patricia Ulloa sinalou que Galicia é unha verdadeira potencia neste sector, como o demostran os 130 viveiros existentes na nosa Comunidade, cunha superficie de cultivo que rolda as 900 hectáreas e 7 hectáreas de media por cultivo.

A directora xeral puxo tamén de manifesto que este sector xera unha man de obra directa duns 1.690 empregados, sendo o que presenta o maior ratio de empregados por ha (1,8) do total de sectores do medio rural.

Patricia Ulloa lembrou que a planta que máis se produce en Galicia é a camelia, que se cultiva en dous terzos dos viveiros da nosa Comunidade. A estimación de produción de camelia en Galicia é superior aos 3 millóns de unidades ao ano, o que nos converte nun dos maiores produtores a nivel mundial. Dentro de España, Galicia é a terceira comunidade autónoma que máis planta produce, só por detrás de Valencia e Cataluña.

Planta e flor

Iberflora, a feira internacional de planta e flor, paisaxismo, xardinería, tecnoloxía e bricoxardín, celébrase dende hoxe e ata o vindeiro venres no recinto feiral de Valencia. Na pasada edición contou con 403 empresas expositoras, procedentes na súa meirande parte de España e cun 26% de expositores internacionais de 15 países. Este certame ocupou unha superficie de 53.000 metros cadrados e foi visitado por case 10.000 profesionais, dos cales uns 600 acudiron de países como Emiratos Árabes, Brasil ou Marrocos, ademais doutros da Unión Europea.