Escala inaugural no porto de Vigo do Costa Favolosa con máis de 4.200 persoas

Entrega de agasallo pola escala inaugural

A ‘Costa Favolosa’, un dos buques máis novos e espectaculares da flota de ‘Costa Cruceiros’, chegou hoxe por primeira vez ao Porto de Vigo na súa viaxe de volta cara ás cálidas augas do Mediterráneo, onde estará situado desde agora até o mes de novembro.

O buque realiza a súa primeira escala no porto vigués tras cinco meses navegando polos Fiordos Noruegueses e o Mar Báltico. Nesta viaxe de posicionamento de volta ao Mediterráneo, que empezou o 29 de agosto en Copenhague (Dinamarca), a ‘Costa Favolosa’ levou aos seus pasaxeiros a portos como Dover (Reino Unido) e Lle Havre (Francia) e continuará a súa travesía desde Vigo até Savona, realizando escalas en Lisboa (Portugal), Xibraltar, Málaga e Valencia.

Durante a súa estancia en Vigo, a ‘Costa Favolosa’ trouxo a bordo a un total de 3.256 pasaxeiros de até 40 nacionalidades distintas, na súa maioría alemáns (1.158 pax.), italianos (639 pax.) e daneses (418 pax.), ademais de 1.018 tripulantes. Procedente de Lle Havre (Francia), chegou á Estación Marítima ás 07.00 horas e está previsto que sobre as 18.00, aproximadamente, poña rumbo a Lisboa (Portugal). 

Coas seus 114.500 toneladas de arqueo bruto e capacidade para 3.800 pasaxeiros, o ‘Costa Favolosa’ sairá semanalmente, a partir do 20 de setembro e até o día 11 de novembro, de Barcelona para realizar un itinerario que toca portos mediterráneos tan emblemáticos como A Valetta (Malta), Cagliari, Civitavecchia e Savona en Italia, e Marsella (Francia).

En conmemoración coa chegada do buque, o Presidente da Autoridade Portuaria de Vigo, Ignacio López-Chaves, participou en tradicional acto de intercambio de placas co Capitán do buque, Marco Derin, tras o que visitou as instalacións da ‘Costa Favolosa’. 

Segunda Terminal de cruceiros

A preguntas dos xornalistas en relación co bloqueo por parte do Concello de Vigo ao proxecto de segunda Terminal de cruceiros, López-Chaves lamentou que o Alcalde da cidade, Abel Caballero, ‘actúe como axente dos Portos de Coruña e O Porto en detrimento de Vigo’. Neste sentido, lembrou, ‘estamos a facer o que nos indicou a asesoría xurídica do Concello hai xa algúns anos: aprobar o Plan de Usos e modificar o Plan Especial do Porto, e iso é o que fixemos’. Para o Presidente portuario, o bloqueo por parte do Alcalde a este proxecto de vital importante para a dársena viguesa é un claro ‘boicot’ á actuación do Porto. ‘En Coruña e no Porto estarán encantados de que o Alcalde fale mal do Porto de Vigo’ por ‘decisións políticas’. ‘Mentres outras terminais van ofrecer novos espazos, nós non imos poder facelo, polo que perderemos competitividade e iso atrasará as nosas posibilidades de crecemento’.

‘Sabemos que a algúns non lles gusta o tema dos cruceiros, pero nós seguiremos apostando pola segunda Terminal, xa que, tal e como nos acaba de comentar o Capitán da Costa Favolosa, algúns portos crecen e admiten novos barcos e outros, pola contra, bloquéanse e non poden crecer’. Neste sentido, explicou, ‘manifestámoslle que nós non temos problemas de espazo e que a nosa intención é proxectar unha segunda Terminal de cruceiros’.

Degustación de produtos

Tras visitar o buque, o Presidente da Autoridade Portuaria de Vigo, Ignacio López-Chaves, acompañado polo Secretario Xeral de Anfaco, Juan Manuel Vieites, visitou a caseta de degustación de conservas de peixe e marisco ‘CATA A LATA, Goza e saborea todo o sabor do mar con conservas de peixe e marisco españolas’. 

Esta campaña trata de ofrecer un novo servizo aos miles de cruceristas que ano tras ano chegan á cidade por mar a través dunha exhibición dun produto de calidade, como é o caso de conservas de peixe e marisco españolas.

Para iso, desde o pasado mes de xullo, instalouse unha caseta de degustación na Terminal de cruceiros do Porto de Vigo, onde os turistas poden coñecer máis sobre as conservas de peixes e mariscos españolas, ademais de poder degustar diversas tapas elaboradas con estes produtos, acompañadas con viños da DO Rías Baixas.

O obxectivo desta campaña é dobre: por unha banda, o de promover o turismo en Vigo e Galicia tras a escala dos cruceiros no Porto olívico, e polo outro, a promoción internacional de conservas de peixes e mariscos españolas, onde Galicia é un referente, achegando aos turistas a coñecer máis a fondo as conservas españolas, a súa calidade e múltiples posibilidades gastronómicas.

Esta actividade, enmárcase dentro da Campaña de Promoción de Conservas de Peixes e Mariscos que ANFACO-CECOPESCA desenvolverá durante o ano 2015 coa colaboración do Ministerio de Agricultura, Alimentación e Medio Ambiente e o Fondo Europeo de Pesca, e a cal non se podería pór en marcha sen a colaboración da Autoridade Portuaria de Vigo, así como do equipo da  Vigo Cruise Terminal.