Diferentes inicios dos obradoiristas no Eurobasket 2015

O Rio Natura Monbus Obradoiro continúa a pretemporada sen Adam Waczynski e Artem Pustovyi, que disputan coas súas respectivas seleccións nacionais o Eurobasket 2015. Durante este fin de semana, Adam Waczynski brillou en Montpellier coa súa Polonia natal nos dous partidos disputados. Na xornada inaugural os seus conseguiron a vitoria ante Bosnia 68-64. O segundo encontro, ante Rusia, saldouse co marcador de 79-82 a favor para os polacos e con Waczynski como MVP (23 puntos, 1 asistencia, 1 rebote, 27 de valoración). O obradoirista, titular, apareceu nos momentos máis importantes dun partido moi axustado até o final. Encadrada no grupo A, á selección polaca tócalle enfrontarse hoxe a Francia (21.00 horas) e gardar forzas para dous partidos de grupo máis, ante Israel e Finlandia. 

Diferente sorte correu Artem Pustovyi con Ucraína, que aínda non puido inaugurar a súa marcadora de vitorias. Onte os ucraínos caeron ante República Checa (64-78) nun partido no que Pustovyi contou con tres minutos de xogo (4 puntos, 1 rebote). É a segunda derrota, tras a da xornada inaugural ante Lituania (69-68). Os eslavos ven obrigados a gañar hoxe a Estonia (21.30 horas) para non quedar directamente eliminados da competición.