DIA estuda actuacións legais contra a Administración e os gandeiros polo bloqueo en Santiago

A compañía DIA asegurou este venres que estuda “actuacións legais directas” contra os que entende “responsables” do bloqueo do seu almacén en Santiago de Compostela, sinalando a Administración e os gandeiros. Nun comunicado de prensa, DIA destaca que o centro loxístico que ten no Polígono do Tambre “continúa bloqueado de forma ilegal por cuarto día consecutivo por parte dos gandeiros”, ante a “inacción das administracións”, denuncia.

A compañía ratificou que interpuxo o mércores a denuncia pertinente por estes feitos e agora estuda agora “actuacións legais directas” contra os que entende responsables desta situación; “os gandeiros que continúan co bloqueo e a Administración, que a data de hoxe non interveu para o desbloqueo total da situación malia as reiteradas reclamacións”.

Sobre a reunión do xoves do sector lácteo co Ministerio de Agricultura, DIA aclarou que o “principio de acordo apoiado por toda a distribución” aínda non se asinou “debido a que os gandeiros non o apoian”. “A proba é que o almacén de Santiago continúa aínda co bloqueo e dous das tendas de DIA en Santiago sufriron ataques”, lamenta.

BUSCAR SOLUCIÓNS

Ademais, a compañía agradeceu o “comportamento exemplar” de sindicatos e empregados, “xa que son terceiros prexudicados nesta situación”, e asegura que traballa “en buscar as solucións adecuadas para intentar que o prexuízo aos seus traballadores sexa o mínimo posible”.

“DIA está recibindo xa reclamacións económicas por parte dos seus provedores debido aos gravísimos danos económicos que esta situación está a provocar a todos os protagonistas da súa cadea de valor”, subliña no seu comunicado e precisa que “as perdas por cada día de bloqueo do almacén superan os tres millóns de euros”.