Deputación e Agrupación Astronómica Coruñesa estudan o control da contaminación luminosa

A vicepresidenta da Deputación da Coruña, Goretti Sanmartín, reuniuse con representantes da Agrupación Astronómica Coruñesa para estudar distintas vías para o control da contaminación luminosa nos concellos. Os representantes da Agrupación Astronómica Coruñesa, Óscar Sánchez e Xoán Cardelle defenderon a necesidade de reducir a contaminación luminosa nos concellos, un asunto “relevante”, ao seu ver, que afecta ao medio ambiente, ao gasto enerxético e á saúde humana.

Na reunión coa vicepresidenta Goretti Sanmartín, estudáronse as distintas posibilidades de aplicación de medidas de control nos concellos para reducir os efectos negativos da contaminación por luz. A Agrupación Astronómica Coruñesa recomenda regular o acendido e apagado da iluminación exterior en función da ausencia de luz solar, incluír nos sistemas de iluminación mecanismos para a redución do fluxo a partir de certas horas da noite, coidar de que as luminarias non envíen luz por riba do plano horizontal ou iluminar só os lugares onde a luz sexa necesaria. Os representantes da Agrupación Astronómica Coruñesa reclamaron a necesidade de formación do persoal técnico municipal neste ámbito.

A vicepresidencia da Deputación mostrou o seu apoio ás demandas da Agrupación Astronómica Coruñesa e ofreceu a disposición da institución provincial para “colaborar cos concellos para atallar a contaminación luminosa que está a ter repercusións no medio ambiente, no consumo dos propios concellos e na calidade de vida da veciñanza”