Defensa e acusación mostran a súa confianza no xurado elixido para o caso Asunta

As partes personadas na causa pola morte de Asunta Basterra acolleron con satisfacción a elección este martes dos 9 xurados e 2 suplentes que deberán determinar o grao de culpabilidade na morte da menor dos seus pais, Alfonso Basterra e Rosario Porto, únicos acusados no proceso, cuxo xuízo comezará este mércores.

Tras a sesión inicial do martes, tanto a acusación popular como a defensa, en boca do avogado de Rosario Porto, José Luís Gutiérrez Aranguren, coincidiron en mostrar a súa “confianza” no bo facer das persoas finalmente seleccionadas para exercer como xurado popular na causa.

Neste sentido, Ricardo Pérez Lama, un dos letrados da acusación popular que exerce a Asociación Clara Campoamor, mostrouse “convencido” de que o xurado seleccionado “vai facer ben o seu traballo”.

Pérez Lama incidiu en que a parte máis difícil desta primeira sesión foron as preguntas que cada parte realizou aos candidatos, que foron “moitas” e provocaron que a elección se prolongase durante máis de catro horas. Os candidatos recusados, catro, fórono por parte das defensas e da Fiscalía, xa que a acusación popular “non fixo uso dese comodín”.

Ricardo Pérez Lama evidenciou a súa confianza na solvencia do xurado elixido e na capacidade dos seus integrantes para “analizar as probas que se lle presenten” e non deixarse influír por outros elementos.

AS DEFENSAS, SATISFEITAS

Pola súa banda, o avogado defensor de Rosario Porto confirmou que as defensas en conxunto utilizaron até en tres ocasións a súa capacidade de recusación, algo que podían realizar catro veces en total. “Sobráronnos recusacións”, indicou.

Aínda que nesta sesión non era necesario fundamentar os motivos desta recusación, Gutiérrez Aranguren falou do caso de dous candidatos que no cuestionario previo aseguraron que “non tiñan ningún tipo de prexuízo nin opinión formada”, aínda que hoxe admitiron que si.

A pesar de que o letrado expresara con anterioridade o seu temor a non conseguir un xurado imparcial, este martes mostrouse “satisfeito” e expresou a súa “confianza” nos cidadáns e “no sentido común”.

“O que eu temía é que houbese xente que estivese influenciada e que houbese xente que tivese un prexuízo e non estivese disposta a escoitar”, apuntou Aranguren, para engadir que “confía na honradez” dos elixidos. “Non teño ningunha razón para dubidar da súa palabra”, ratificou, tras indicar que a súa defendida é “a primeira interesada” en que o xuízo “se celebre xa”.

Para a elección dos membros do xurado, o avogado defensor de Porto recibiu asesoramento de compañeiros de profesión con experiencia neste tipo de xuízos, confirmou, así como de expertos en psicoloxía, en busca dun “perfil de imparcialidade”.

Sobre as próximas xornadas, Aranguren criticou que as partes aínda descoñezan a orde no que declararán os acusados, á vez que anunciou que presentará “algunha nova proba” durante a primeira sesión.

ROSARIO, CON FORZAS

Finalmente, Gutiérrez Aranguren falou da situación de Rosario Porto, coa que este luns mantivo unha reunión de varias horas no cárcere de Teixeiro.

Durante este encontro, o letrado viu á súa defendida “con forzas para afrontar o xuízo” e transmitiulle que “non teña medo” en relación ao xurado popular, dado que “a xente da rúa é tan sensata ou máis que os que vestimos toga”. Ante os medios confirmou que a nai de Asunta contestará as preguntas de todas as partes.

Sobre o feito de que non asista á sesión deste martes, o seu avogado asegurou que se tratou dunha suxestión realizada por el, dado que durante as próximas xornadas Porto realizará “moitas conducións” desde Teixeiro, “que son esgotadoras”.