Continúan estables os dous feridos no Rally da Coruña ingresados no Chuac

Os dous feridos no Rally da Coruña que continúan ingresados no Complexo Hospitalario Universitario da Coruña (Chuac) seguen en estado estable e con evolución favorable, segundo informaron fontes hospitalarias. Trátase dun adulto, ingresado en planta no Hospital da Coruña, e un menor, tamén en planta, neste caso no Hospital Materno Infantil Teresa Herrera da cidade herculina.

Estas dúas son as únicas persoas que permanecen no Complexo Hospitalario Universitario da Coruña, tras o accidente de rally, ao seu paso polo termo municipal de Carral, no que houbo sete falecidos e máis dunha decena de feridos.