Caballero reitera que non recibiron agasallo algún nin el nin ninguén da súa contorna

O alcalde de Vigo, Abel Caballero, que acaba de ser imputado no marco da ‘Operación Patos’, reiterou este venres “de forma categórica e contundente, e con máis convicción que nunca” que non recibiron “agasallo algún da empresa Eiriña -investigada na causa- nin el nin ninguén da súa contorna”.

Así o manifestou a través dun comunicado emitido despois de que se coñeceu a decisión da xuíza de instrución número 7 de Vigo de imputarlle a el e a outros 45 políticos, empresarios e funcionarios, ademais de manter os cinco imputados iniciais, na causa xudicial da ‘Operación Patos’.

“Non recibín o reloxo ao que alude o Ministerio Fiscal, nin eu nin ninguén da miña contorna”, insistiu en relación ao reloxo valorado en 1.750 euros que a fiscalía apuntou que recibiría o alcalde “como agasallo no ano 2010” e achega do que Caballero volveu a asegurar este venres que non hai “constancia neste Concello desa entrega”.

Ademais, sobre a pluma estilográfica -unha pluma de ouro e prata que o Fiscal cre que Eiriña puido regalarlle en 2009-, o rexedor reiterou que “é a propia UDEF a que mostra que non existiu tal agasallo porque foi devolto pola empresa ao comercio, e así o corrobora a propia documentación da policía”. Esta mesma semana Caballero exhibira parte dun informe policial para apoiar esta afirmación.

Por todas estas cuestións, o alcalde volveu a recalcar este venres que non ten “nada que ver en todo este asunto”. “E así o teñen que saber os integrantes do poder xudicial”, concluíu.