Caballero afirma que a FEMP estuda a estrutura coa que dar acollida aos refuxiados

O alcalde de Vigo e novo presidente da Federación Española de Municipios e Provincias (FEMP), Abel Caballero, comunicou este luns que este organismo xa está “neste momento” estudando “a estrutura” a facer para dar acollida aos miles de refuxiados que chegan a Europa.

En declaracións aos medios en Vigo, Caballero manifestou que está “en contacto” co recentemente nomeado secretario xeral da FEMP, Juan Ávila -exalcalde de Cuenca e expresidente da Deputación da provincia homónima-, quen está “a estudar a estrutura (que teñen) que facer” para acoller aos refuxiados.

“Esta enorme crise de refuxiados que ten Europa vai ter unha resposta de solidariedade e de apertura desde a FEMP e desde os concellos que compomos a FEMP”, recalcou, antes de manifestar que con iso pretenden “dar resposta, baixo as directrices de Europa, do Goberno de España, e á beira das comunidades autónomas, á gran crise humanitaria de refuxiados”.

Así as cousas, garantiu que os refuxiados “ao final van estar todos nalgún concello e van facer a súa vida á beira” dos cidadáns españois. “Haberá aquí en Vigo, e haberá en Madrid… estarán en todas partes e por iso queremos facer ese desenvolvemento en rede”, concluíu.