Besteiro esixe a Feijóo absoluta transparencia sobre a crise sanitaria no hospital de Vigo

O secretario xeral dos socialistas galegos, José Ramón Gómez Besteiro, esixiu ao presidente da Xunta, Alberto Núñez Feijóo, unha “total información e absoluta transparencia” respecto da “crise” sanitaria no novo hospital de Vigo, o Álvaro Cunqueiro. “É o que se espera del e non serve con esconderse na espera do tempo, senón que hai que dar información inmediata e apelar a que, quen é o líder do PP e presidente da Xunta, asuma as súas responsabilidades e lidere esta crise, que é máis evidente que nunca que se está producindo”, manifestou en declaracións aos medios antes da tractorada do sector lácteo deste xoves en Lugo.

Así, o líder do PSdeG reclamou que a “Xunta lidere esta crise sanitaria como ten que facelo” e insistiu na necesidade de que se dea “información”.

“Cando estes supostos se producen, estes feitos desgraciados se producen, o que máis bota en falta a cidadanía é que se informe”, recoñeceu Besteiro quen, aínda lanzando unha mensaxe de “prudencia e de tremenda responsabilidade”, pediu “esa información e que o presidente da Xunta lidere esta crise sanitaria”.

“MODELO PROFUNDAMENTE PRIVATIZADOR”

O secretario xeral do PSdeG lembrou que o hospital de Vigo é “unha infraestrutura que naceu en tempos do Partido Socialista (bipartito) que ía ter un custo de 400 millóns e ao final vai supor un pago para todos os galegos de 1.500 millóns”.

“Triplícase ese custo e, ademais, é un modelo profundamente privatizador porque se triplica o gasto e non vai ter máis oferta de camas nin máis servizos, senón menos”, denunciou Besteiro.

Respecto diso, abundou que se pagará tres veces máis para ter peor servizo” e reiterou que “non é unha forma de prestar o servizo sanitario desde a perspectiva pública”.

PARALIZACIÓN E ANTECEDENTES

A semana pasada, o Sergas paralizou o traslado de pacientes ao Álvaro Cunqueiro debido a que non estaba garantida “ao cento por cento” a calidade do aire ambiental en áreas críticas como quirófanos, algunha UCI, reanimación e área materna infantil. No entanto, Sanidade reiterou que, no resto do hospital, incluídas as zonas onde hai pacientes ingresados, estaban garantidas as condicións de bioseguridade para enfermos e traballadores.

Na mesma liña pronunciouse a conselleira do ramo, Rocío Mosquera, este martes no Barco de Valdeorras. A preguntas dos xornalistas, asegurou que as análises desas áreas sensibles daban “algunha alteración”, pero negou que houbese crecemento de fungo ‘aspergillus’ nos cultivos e mostras.

No ano 1998, un brote de aspergillus ocasionou a morte a seis pacientes ingresados no hospital vigués de O Meixoeiro. Anos máis tarde, en 2005, un tribunal exculpou aos directivos do Sergas que sentaron no banco por estes feitos.

Posteriormente, no verán de 2012, de novo a presenza deste fungo obrigou a pechar unha planta nese hospital. Nese caso, houbo dous falecementos, pero non se chegou a establecer relación directa entre as mortes e o fungo, e tratábase de pacientes cunha patoloxía de base xa moi grave.