Aumenta o número de gandeiros que permanecen concentrados en Lugo

A cidade de Lugo continúa recibindo tractores chegados de distintos puntos da provincia para sumarse á reivindicación dos gandeiros que se desmarcaron dos sindicatos na protesta para poñer fin á crise do sector lácteo. Deste modo, o número de vehículos supera o medio millar. O voceiro desta protesta, Roberto López, tamén expresou o seu apoio aos gandeiros que decidiron acudir á capital galega para formar parte dunha multitudinaria tractorada convocada pola Plataforma Galega en Defensa do Sector Lácteo. “Estamos en total acordo coas súas peticións”, aseverou.

Así as cousas, puntualizou que o motivo polo que decidiu desmarcarse dos sindicatos é “a falta de información absoluta”. “Non hai división dos gandeiros, todos estamos unidos, todos temos que cobrar o leite a final de mes e todos a cobramos pouco e con meses de atraso, estásenos a roubar, pero as organizacións negocian e non nos informan”, criticou.

Neste sentido, denunciou que as organizacións sindicais que “só contan o que eles queren e despois de pechar os acordos, cando se fan a foto final”. “Non sabemos que negocian, e esa foi a faísca que saltou en Lugo”, explicou.

En paralelo á súa permanencia na cidade da muralla, os gandeiros están a recoller sinaturas para entregar no rexistro da Xunta un escrito dirixido á conselleira de Medio Rural, Rosa Quintana, coas súas reclamacións. “Como non somos unha organización, non nos deixan entregalo sen sinaturas”, detallou un gandeiro.

RECOLLIDA DE SINATURAS

Ao respecto, destacou o apoio que están a recibir da cidadanía lucense. “Estámonos a portar ben e estamos a intentar facer as cousas ben; a xente pórtase ben, pregúntanos e sinatura sen problema”, indicou.

Tamén outro gandeiro agradeceu o respaldo dos lucenses. “Podemos ir durmir á casa ás tres ou catro da mañá e deixar aquí os tractores porque non lles pasa nada e Lugo nos trata de marabilla”, resaltou.

Pola súa banda, o secretario xeral de Unións Agrarias, Roberto García, fixo un chamamento a “calquera nova organización” a sumar, xa que “todo o que sexa cuestionar e dividir non axuda”. Ademais, engadiu que as tractoradas están convocadas pola Plataforma en Defensa do Sector Lácteo, “polo que todos están representados”.