Adxudicado o servizo de cafetería da Festa do Marisco
O concurso para a explotación da Cafetería da Festa do Marisco foi resolto no mediodía de hoxe. Logo do procedemento administrativo iniciado hai dúas semanas a mesa de contratación, configurada segundo a normativa establecida, procedeu a apertura de plicas. O concurso estivo aberto dende o 10 ó 18 de setembro e permitía que calquera empresa ou particular puidera participar no mesmo sendo publicitada a oferta no Boletin Oficial da Provincial e a través da web do Concello.
As condicións esixidas no concurso son as establecidas pola normativa vixente: solvencia técnica e profesional. Os criterios avaliables para a adxudicación eran:
1. Melloras relativas á calidade dos materiais, estética e decoración da carpa (ata 20 puntos).
2. Melloras propostas en relación coa oferta de actividades culturais/e o musicais complementarias das organizadas polo Concello (ata 20 puntos)
3. Oferta económica; marcándose o prezo mínimo de licitación en 3.500 euros (ata 60 puntos).
Logo de rematado o prazo foron tres as empresas locais presentadas: Alfonso Padín, Alfonso Mourelos e Francisco Álvarez. A valoración das propostas realizada pola Mesa de Contratación foi a seguinte:
Concursante |
Decoración e estética |
Programación cultural |
Aportación económica |
Puntuación final |
Alfonso Padín |
Non presenta |
Non presenta |
3.711 euros |
35 |
Alfonso Mourelos |
10 |
20 |
4.000 euros |
70 |
Francisco Álvarez |
20 |
10 |
6.000 euros |
90 |
Logo de revisada a documentación a Mesa procedeu a adxudicar a cafetería á proposta de maior puntuación.
Novo procedemento
A saída a concurso da cafetería da Festa do Marisco foi unha medida posta en marcha para evitar o problema das edicións anteriores no relativo a adxudicación da mesma. Logo das consultas ós técnicos municipais indicouse que o sistema máis obxectivo pasaba por un concurso aberto onde a mesma se adxudicara ó mellor postor. Lémbrase ademais que tódolos veciños e veciñas que así o desexen poden consultar a documentación presentada e todo o procedemento realizado.