A tractorada de Santiago cerca a capital galega ao longo de 10 quilómetros

Tractores invadindo as principais vías de Santiago

A masiva tractorada que arrincou en Santiago pasadas as 14,00 horas deste luns desde Salgueiriños rodeou á capital de Galicia ao longo de 10 quilómetros con máis de 3.000 vehículos gandeiros que bloquean algunhas das principais vías da cidade como a Avenida de Lugo -con todos os carrís cortados- ou a rúa do Hórreo ao seu paso pola estación de tren.

Ao redor das 19,00 horas a protesta dos gandeiros galegos para reclamar prezos xustos para o seu leite completou un inmenso círculo, o cal pasou pola Avenida Castelao, Salvadas, Galeras, San Lourenzo, Romero Donallo, Hórreo, Avenida de Lugo e Rodríguez de Viguri, entre outras rúas.

Esta protesta provocou diversos problemas circulatorios que afectaron tamén ás liñas de autobús urbano, que tiveron que suprimir varias das súas paradas e percorridos, así como causaron un gran número de atrasos.

Así, a circulación estivo cortada e houbo retencións ao longo do día en accesos a Santiago pola SC-20, na rotonda de Galuresa, na zona de Conxo, na Rúa da Senra dirección Pombal, así como en rúas adxacentes á Avenida de Lugo, entre outras, segundo informou a Policía Local.

De tal forma, os gandeiros que foron chegando á altura de Rodríguez de Viguri na tarde deste luns manteñen cortada esta zona do periférico de Santiago en ambas as direccións, e realizarán unha asemblea ás 20,00 nas inmediacións da estación de autobuses para decidir medidas a seguir.