A Deputación de Pontevedra adxudica o servizo de recollida e tratamento de vehículos abandonados nos concellos de menos de 50.000 habitantes

A Deputación de Pontevedra adxudicoulle á empresa Vigoto Uno S. L. o contrato, durante os próximos dous anos, para prestar o servizo de recollida, transporte, descontaminación e tratamento de vehículos declarados residuos urbanos nos 44 concellos da provincia con poboación inferior ós 50.000 habitantes xa adheridos, e nos que desexen adherirse, ó Convenio de Xestión de Vehículos Fóra de Uso, para o seu posterior tratamento e desmonte con destino á súa reutilización ou reciclaxe por centros autorizados. Ó concurso, por procedemento aberto, presentáronse dúas empresas, das que Vigoto Uno S. L. obtivo a maior puntuación.

Desta forma a Deputación de Pontevedra dá resposta ó incremento do número de automóbiles abandonados nos distintos municipios da provincia, coa consecuente contaminación ambiental e visual que provoca.