Un buque mercante permanece fondeado en Ares en corentena sanitaria

Un buque mercante con bandeira italiana permanece fondeado na ría de Ares (A Coruña) en corentena sanitaria despois de que falecese un dos seus tripulantes cando navegaba fronte á costa de Vigo. Segundo explicaron fontes do Porto de Ferrol, o buque permanece neste punto despois de que a autopsia realizada ao home, que faleceu tras ser evacuado en helicóptero á cidade olívica, determinase que padecía unha enfermidade contaxiosa.

Este mercante, coñecido como ‘Granato’, tiña como destino o Porto de Ferrol pero fondeará na ría de Ares ata que as autoridades con responsabilidade en sanidade exterior determinen os pasos a seguir, precisaron as mesmas fontes. Polo momento descoñécense máis datos sobre as causas que provocaron a morte do tripulante deste buque, que as forzas de seguridade vixían.