O porto de Vigo recibe a unhas 3.500 persoas a bordo do ‘Disney Magic’

O Porto de Vigo recibirá o vindeiro xoves, 6 de agosto, a escala do ‘Disney Magic’, con máis de 3.500 persoas a bordo, entre pasaxe e tripulación. Procedente de Dover (Reino Unido) e con destino final Barcelona, chegará ao Peirao de Transatlánticos ás 07.00 horas, onde permanecerá até as 17.00h, momento no que porá rumbo a Lisboa. A bordo viaxan un total de 2.579 pasaxeiros de 48 nacionalidades distintas, na súa maioría norteamericanos (1.128), británicos (867) e canadenses (130), e 1.018 tripulantes. 

Este cruceiro pertence á naviera Disney Cruise Line, do mesmo xeito que o seu xemelgo, o Disney Wonder; o Disney Dream e o Disney Fantasy. Construído por Fincantieri en 1998, en outubro de 2013 concluíu a súa máis recente renovación, que ademais da mellora de camarotes, salóns e o spa, incorporou novas atraccións e actividades, como os tobogáns e piscinas de AquaLab e AquaDunk ou a Academia dos Vengadores de Marvel, área de xogos inspirada nos famosos personaxes de cómic. 

Como todos os cruceiros da compañía Disney Cruise Line, trátase dun cruceiro temático orientado a familias e apaixonados polo mundo Disney, con actividades de lecer e entretemento para todos os públicos ao longo das súas 11 cubertas de 294 metros de lonxitude e 32 metros de anchura máxima, sempre acompañados por personaxes Disney como Mickey, Minnie ou Pluto. 

Concibido como un “clásico moderno” para evocar o glamour e a beleza da época dourada das viaxes transoceánicos, o estilo Art Decó está presente nas pinturas, mobles e esculturas que decoran os seus interiores, entre os que destacan a figura en bronce de Mickey, situada no vestíbulo principal e a espectacular lámpada de vidro realizada polo famoso escultor estadounidense Dale Chihuly. 

O Disney Magic é un vello coñecido do Porto de Vigo, que nos visitou por primeira vez en 2010, e que xa entón foi recibido con gran ilusión polos nenos vigueses desexosos de ver en persoa o seu característico deseño e aos seus famosos tripulantes. 

O Presidente da Autoridade Portuaria, Ignacio López-Chaves, destaca que con esta escala o Porto de Vigo acredita o seu posicionamento nas rutas de cruceiros temáticos,  polas que a Autoridade Portuaria quere apostar cos novos investimentos.