Noriega insiste en que os partidos teñen que ser xenerosos para lograr a confluencia

O alcalde de Santiago de Compostela, Martiño Noriega, insistiu en que os partidos políticos e todos os axentes implicados deben ser “xenerosos” para que este proceso poida culminar nunha candidatura de confluencia, a única vía que, ao seu xuízo, existe para disputar “a hexemonía ao bipartidismo”.

A preguntas dos xornalistas en rolda de prensa, o tamén covoceiro de Anova (faceta que deixou en segundo plano dende a súa candidatura en Compostela Aberta), coincidiu, así mesmo, coa tese defendida por Xosé Manuel Beiras, que nunha reflexión que se pode consultar na páxina web da súa organización, fai un chamamento a unha cesión de todas as forzas do espectro “rupturista” co fin de confluír nunha lista de “unidade popular”.

Neste sentido, Martiño Noriega subliñou que, no proceso de conformación da candidatura que defende, “non pode haber un espazo de exclusión, senón de moitos motores cidadáns, que son importantes”.

Preguntado pola reunión que tivo lugar este domingo do Consello Cidadán de Podemos e, en concreto, pola marxe de negociación da formación en Galicia, o rexedor compostelano cualificou de “positivo” que existan estas conversacións.

O secretario xeral de Podemos, Pablo Iglesias, apoiou, na súa visita en xuño a Galicia, que haxa un grupo parlamentario galego propio -co que establecer unha relación estable-, aínda que a presenza das siglas segue sendo a principal condicionante para a confluencia final.

“XENEROSIDADE E RESPONSABILIDADE”

En todo caso, e tras chancear cun “parabéns a Podemos por ter autonomía”, Noriega insistiu no seu “respecto” cara ás “posicións das partes”, en referencia a cada unha das organizacións políticas.

Non obstante, apelou á “xenerosidade e á responsabilidade”, ao respecto do que puxo o exemplo da candidatura de Compostela Aberta, que tras aglutinar a formacións como Anova, Esquerda Unida e a inscritos de Podemos (entre outros apoios de partidos e persoas sen adscrición política), logrou ser a lista máis votada nas eleccións do pasado 24 de maio.

Así as cousas, Noriega incidiu en que o actual é un momento “histórico” e en que a confluencia é a “única vía para disputarlle a hexemonía ao bipartidismo”.

“INDIXESTIÓN” DE RAJOY

Por outra banda, sobre o ataque do presidente do Goberno, Mariano Rajoy, ás mareas no inicio do curso político en Soutomaior (Pontevedra), Noriega asegurou non se sentir “interpelado” polas palabras do líder do PP estatal.

Así, cargou contra o “mito do bo xestor” que, na súa opinión, o PP pronuncia en todos os discursos, cando o que eles realizan é unha “indixestión”, criticou.

“Son capaz de xestionar e de marcarme uns compromisos electorais”, defendeu. Neste sentido, censurou que populares apliquen unha política de “lífting”, en detrimento das “reformas de campo”, que, ao seu xuízo, as candidaturas de unidade popular levarán a cabo.

Así mesmo, sinalou que o próximo venres viaxará a Barcelona para reunirse con outras mareas para o “intercambio de experiencias”.