Máis de 300 xóvenes participaron nos campamentos de verán de Ames

Este ano un total de 316 nenos/as e mozos/as gozaron duns días de descanso e divertimento nos campamentos municipais de verán, que se desenvolveron na granxa escola Fervenzas do Toxa (Silleda), na granxa escola El Kiriko (Fornelos de Montes), no campamento náutico de Vilagarcía de Arousa, no campamento xuvenil de Castrelo de Miño e no campamento urbano da Aula da Natureza. Divididos por franxas de idade, nestas actividades participaron 267 nenos/as de educación infantil e primaria e 49 mozos/as da ESO. A través destas actividades os rapaces e rapazas tiveron a posibilidade de pasar uns días divertidos ao tempo que fixeron novos amigos.

O servizo municipal de campamentos de verán, supón unha oferta formativa de desenvolvemento persoal concibida para que, de xeito progresivo, os/as nenos/as e mozos/as adquiran as ferramentas precisas para lograr a súa autonomía e independencia fomentando a convivencia, cooperación, respecto e un xeito de vida saudable ao tempo que permite un achegamento ao medio natural, ao deporte e a cultura. Esta iniciativa enmárcanse dentro dos programas de dinamización de actividades dirixidas ao público desenvolvidas tanto pola Aula da Natureza como da Oficina de Información Xuvenil.

Un grupo de 41 rapaces e rapazas de 4º, 5º e 6 de educación infantil, que estiveron divididos en dous grupos, foron os primeiros en ir de campamento á granxa escola Fervenzas do Toxa (Silleda). Os nenos e nenas de 4º e 5º estiveron neste lugar dous días e unha noite, mentres que os que este ano cursaron 6º de educación infantil dispuxeron de tres días e dúas noites para estar neste campamento. Durante a estadía neste campamento participaron en actividades de horta, piscina e repostería, coidaron os animais da granxa-escola; fixeron obradoiros de manualidades con material de reciclaxe, e participaron en veladas nocturnas. Ademais, os rapaces maiores (6º de primaria) participaron en actividades de hípica e escalada.

Ademais, un grupo de 76 nenos e nenas de 1º e 2º de educación primaria foron á granxa escola El Kiriko, que está en Fornelos de Montes, onde pasaron tres días e dúas noites. Nestas campamentos os rapaces e rapazas participaron en actividades de grupo, xogos colectivos, actividades de auga como o piragüismo e obradoiros ambientais. Ademais, practicaron escalada e fixeron actividades de cociña, horta e granxa. Os nenos e nenas de 3º e 4º de primaria tamén acudiron a este mesmo campamento. A maiores realizaron actividades de piragüismo e tiro con arco. 

Por outra banda, os rapaces e rapazas de 5º e 6º de educación primaria estiveron seis días  no campamento náutico de Vilagarcía de Arousa. Neste caso realizaron diferentes actividades acuáticas (windsurf e vela lixeira en dous tipos de embarcacións), veladas nocturnas e grandes xogos. Ademais, tiveron clases teóricas e prácticas para aprender a navegar. Para poñer en práctica o aprendido foron navegando ata a illa de Cortegada.

Campamento xuvenil

Un grupo de 49 mozos e mozas, que cursaron estudos de ensinanza secundaria obrigatoria durante o pasado curso estiveron oito días no campamento xuvenil de Castrelo de Miño. As activades desenvolvidas neste campamento tiveron como fío condutor e unificador a natureza, a ciencia e a auga. Os mozos/as puideron practicar varias disciplinas deportivas nun espazo medioambiental no que aprenderon a través do xogo, e onde o río tivo un papel protagonista xa que ao pé do río Miño está situado o parque náutico de Castrelo de Miño. 

Por último, cómpre destacar que o Concello de Ames volveu a organizar unha nova edición do campamento urbano nas dependencias da Aula da Natureza. Dende o 6 ata o 17 de xullo, un total de 22 nenos e nenas de 6 a 13 anos, participaron nunha visita á gandería Busto-Corzón, que está situada no concello de Mazaricos, e a participación nunha andaina ambiental pola ruta do Tambre. Ademais, estas saídas combináronse con outras actividades como obradoiros de cociña, xogos tradicionais, obradoiros ambientais, actividades de astronomía e actividades de horta. O campamento urbano rematou cunha gran festa na que se lle entregaron os diplomas aos/as participantes e na que houbo unha merenda e diferentes xogos.