Ferrol pretende encher as rúas da cidade con xente co programa festivo do 21 ao 31 de agosto

Ferrol disfrutará do 21 ao 31 de agosto cun programa de festas organizadas para todos os públicos coas que se tentará “encher de xente a cidade e as rúas”. A programación das festas foi presentado neste venres pola concelleira de Festas, Beatriz Sestayo (PSOE), que avanzou que o obxectivo será que “Ferrol se vista de festa durante todos os días”.

Con este fin organizáronse uns festexos “plurais e transparentes” que parten da participacion cidadá, nos que se tivo moi en conta as suxerencias que os cidadáns fixeron chegar a través da páxina web do Concello, así como as aportacións dos comerciantes e hosteleiros, e nas que se fixo “unha discriminación positiva” a favor de empresas de iluminación, son e organización da cidade.

As festas tiveron que ser organizadas en tan só un mes, dado que non había nada previsto, e cunha cantidade de 180.000 euros, a partida que quedaba dispoñible no departamento tras o cambio de goberno, moi inferior aos preto de 360.000 euros que destinaba o PP, e que adxudicaba por trámite de urxencia a unha empresa.

“A cantidade é menor que a doutros anos porque as circunstancias sociais parece que non aconsellan trasladar partidas doutras concellerías para festas”, engadiu a concelleira Beatriz Sestayo.

PROGRAMA

As festas comezarán co pregón na praza de España o día 21 de agosto ás 22:30 horas, cun pregoeiro que será anunciado nos próximos días. O artista ferrolán Andrés Suárez, un dos que máis demanda suscitou nos correos de cidadáns enviados ao Concello, será o encargado de abrir a programación musical das festas, cunha actuación na que estará acompañado de toda a súa banda. Será ás 23:00 na praza de España.

O sábado 22 terá lugar o concerto do grupo Efecto Pasillo, que encherá de ritmos latinos de pop e rock a praza de Españá dende as 22:30 horas. Durante todo o día terá lugar o Rallie de Ferrol, que continuará o domingo, e haberá ademais actividades infantís a cargo de La Guagua, ás 18:30 no pavillón de Esteiro e ás 19:30 na praza do Himno Galego. En Caranza, o sábado 22, desenvolverase a Festa do Choco, acompañada da música de Los Zares, dende as oito da tarde.

O domingo 23 será un día no que brilará a maxia, coas actuacións do mago Don Gelatti, ás doce e media no Cantón de Molíns e ás oito no Inferniño, pero no que tamén terá un protagonismo especial o feminismo e a muller. Ás seis da tarde farase un paseo turístico da ruta Ferrol en feminino, comezando en Ferrol Vello, e coa previsión de finalizar a tempo para o concerto da artista galega Sés, na praza de España, ás once da noite. Previamente, ás dez, actuará o grupo folk local Lenda Ártabra. 

O luns 24 de agosto terá lugar o tradicional concerto de Rondallas, ás nove da noite na praza de Armas. O martes 25 será o turno da conmemoración da Batalla de Brión, coas Salvas na praza de Armas ás doce da mañá e os actos na parroquia de San Felipe. Ás nove e media da noite será o turno do cine, coa proxección ao aire libre na praza de Sevilla, da película de animación “Maimiño”.

O mércores 26 chegará a Ferrol o espectáculo de animación infantil “As mil e unha noites”, na praza Vella ás oito da tarde, e poderase ver o concerto do rapeiro ferrolán Abuín, que está a triunfar nas redes sociais co seu proxecto “12 meses”. Será na praza do Inferniño ás nove da noite.

O xoves 27 en Ferrol haberá música soul e jazz, co concerto en Amboaxe de Freedonia, ás dez e media da noite, unha das formacións que ofrece un dos mellores directos que se pode ver hoxe en día en España. Previamente, actuará Jaime Frithring, ás nove e media, para presentar o seu primeiro disco. A animación familiar tamén terá o seu oco este día, co espectáculo Bambalas ás doce e media na praza do Inferniño e ás oito na praza Vella. 

O sábado 29 a música volverá encher a praza de Amboaxe, ás once e media da noite, coa actuación do grupo El columpio asesino e a súa música de xogo de pop con electrónica e de rock con punk. Unha hora antes actuará a banda ferrolá Carrero Bianco. A animación na rúa virá a cargo do musical familiar “De aquí para alá”, que se poderá ver ás oito en Canido.

O domingo 30, Peter Funk, coñecido como o mellor paiaso do momento en Galicia, chegará á praza de Ultramar pola mañá e ao Cantón de molíns pola tarde.

Pero sen dúbida poderase ver a un dos grandes protagonistas da programación de festas deste ano, Ara Malikian, un dos máis expresivos violinistas do mundo, que actuará na praza de Amboaxe a partir das dez e media da noite. 

E xa para rematar, o luns 31 as festas farán un guiño ás Meninas de Canido, coa realización de pinturas en Amboaxe durante a tarde, coa participación do artista Eduardo Hermida, como acompañamento para outro dos espectáculos familiares máis esperados, “A nena e o grilo van de festa”, de Magín Blanco. 

Todas estas actividades culturais e musicais completaranse cun amplo abano de actividades deportivas. Así, o luns 24 haberá unha Masterclass de Zumba e circuito funcional na praza de España durante a mañá, o martes unha exhibición de Lantin Fun en Amboaxe, o mércores de zumba e Body Combat no parque Raíña Sofía, o xoves destas mesmas disciplinas no Inferniño, e o venres de Taichi e circuito funcional na praza Carmelo Teixeiro. Todas estas actividades serán ás doce da mañá.

Ademais, o mércores 26 disputarase no Campo da Gándara o I Trofeo feminino de fútbol Concepción Arenal, co que se tentará dar relevancia e presenza ao deporte feminino.

E como non podía ser doutro xeito, os fogos artificiais porán o colofón ás festas deste ano o luns 31 de agosto.