Feijóo móstrase optimista sobre a posibilidade de que Pemex constrúa máis barcos en Barreras

O presidente da Xunta, Alberto Núñez Feijóo, mostrouse este venres “optimista” sobre a posibilidade de que Pemex “faga máis barcos” no estaleiro vigués Hijos de J. Barreras, cuxo 51 por cento é propiedade da petroleira mexicana. Preguntado polo futuro do estaleiro tras manter unha reunión co alcalde de Ferrol, Jorge Suárez, o mandatario autonómico expresou “optimismo sobre o futuro”.

“Non me corresponde a min anunciar máis barcos de Pemex en Galicia”, admitiu, pero si deu conta de que o “contacto” que mantén con Pemex e coa súa filial PMI lle fai “albergar esperanzas” de que a petroleira “faga máis barcos” en Barreras.

Con todo, puntualizou Feijóo que se trata de “dúas empresas privadas” e que a elas corresponde “concretar” esa posibilidade. “Pero a información que temos dende o Goberno é positiva e optimista”, remarcou.