publicidade hoxe

Asínase o convenio de adhesión de Vedra á Axencia de Protección da Legalidade Urbanística

PUBLICADO EN: Noticias de GaliciaVedra
A-
A+
Sinatura do convenio de adhesión

Sinatura do convenio de adhesión

O director da Axencia de Protección da Legalidade Urbanística, José Antonio Cerdeira, e o alcalde de Vedra, Carlos Martínez Carrillo, asinaron esta mañá o convenio de adhesión á Axencia Galega de Protección da Legalidade (APLU) por parte deste concello coruñés, polo que, a partir de agora, este municipio delega neste organismo as súas competencias municipais de inspección, supervisión, sanción e restablecemento da legalidade urbanística respecto das obras e usos do solo que se realicen en solo rústico, en solo urbanizable mentres non sexa aprobado o correspondente plan parcial ou de sectorización, así como no ámbito dos núcleos rurais delimitados.

Así mesmo, os ingresos obtidos por multas coercitivas e sancións administrativas impostas en exercicio das competencias delegadas, serán repartidos a partes iguais de modo que o 50 por cento pasará á Administración autonómica e o 50 por cento restante ás administracións municipais.

Deste xeito, o Concello de Vedra sumarase aos 64 concellos que a día de hoxe forman parte da Axencia de Protección da Legalidade Urbanística.

Este proceso lévase a cabo conforme a lei do 30 de decembro, de ordenación urbanística e protección do medio rural de Galicia, onde se establece que a APLU é un ente público de natureza consorcial, dotado de personalidade xurídica, patrimonio e orzamento propios e plena autonomía no cumprimento das súas funcións, para o desenvolvemento en común pola Administración autonómica e os municipios que voluntariamente se integren nela das funcións de inspección, restauración da legalidade e sanción en materia de urbanismo e o desempeño de cantas outras competencias lle asignan os seus estatutos.

6 de agosto de 2015 | 16:17 • Sen comentarios

Comentarios pechados.