Aceites Abril ofrecerá en Tui o espectáculo “Maxia Verde”

Aceites Abril ofrecerá en Tui este sábado 8 de agosto ao redor das 21.30 horas o seu espectáculo Maxia Verde. A actuación englóbase dentro da ampla programación do 11º Festival Música non Claustro que se desenvolverá entre os días 7 e 9 deste mes na catedral do Tui. Utilizando como fío condutor a lema do festival, #Contrastes, o Mago Teto ofrecerá unha sesión onde a ilusión e a boa cociña serán os principais protagonistas. Os incribles xogos de maxia que ofrecerá este recoñecido mago con cartas e moedas mesturaranse (ou contrastarán) cos aceites da empresa ourensá, que destaca polo seu firme compromiso coa cultura e a gastronomía.

Esta sesión ofrecida por Aceites Abril está pensada para que grandes e pequenos poidan gozar dunha amena velada. O espectáculo Contrastes de Maxia Verde converterase no complemento ideal para as actuacións dos novos intérpretes do Conservatorio Profesional de Música de Tui e do concerto de órgano do compositor e pianista holandés Mike del Ferro. 

Música non Claustro 

A undécima edición do Festival Música non Claustro chega cargada de novidades, entre as que destaca a propia programación familiar na que participa activamente Aceites Abril. Os novos intérpretes convivirán cos acordes de músicos profesionais como Samuel Diz, Mike del Ferro ou Xabier Díaz e os irmáns Álvarez. O programa tamén contempla unha completa sección dedicada a talleres de artesanía, que se desenvolverán entre mañá e o domingo. Así, os asistentes á cita poderán coñecer de primeira man a elaboración de esculturas en vimbia (que coordinará Idoia Costa), ou de instrumentos tradicionais como o pandero (que dirixirá Xaneco e que se completará cun encontro co músico e investigador Xabier Díaz).

Tamén terán a posibilidade de crear en familia os seus propios xoguetes sonoros ou de participar nun obradoiro creativo que terá como eixo central o patrimonio cultural. Todas as actividades incluídas no Festival Música non Claustro son de carácter gratuíto. Para os talleres requírese unha inscrición previa.