A Fundación expón os censos para a renovación do Consello Consultivo do Deporte

A Fundación Municipal de Deportes de Vilagarcía expón ao público durante todo o mes de agosto os censos para o proceso de renovación do Consello Consultivo do organismo autónomo. Os Clubs e entidades deportivas, Anpas, Xefes de departamentos de Educación Física dos centros educativos e Asociacións de Veciños deberán elixir a un total de cinco representantes na proporción que eles mesmos decidan.

Os censos e o calendario electoral poderanse consultar na sede da Fundación, no Multiusos de Fexdega, ou no taboleiro de anuncios da web municipal www.vilagarcia.es . Os interesados en presentar algunha alegación para corrixir erros omisións deben tramitar as mesmas nas oficinas da Fundación no mesmo prazo de exposición, é dicir, ata finais de agosto.

O Consello Consultivo do Deporte é un órgano creado para promover a participación de tódolos sectores implicados na práctica deportiva no municipio. Tratase dun órgano independente da Fundación, que dirixirán os seus propios membros e que terá total liberdade. Ademais, o Consello Consultivo estará representado no Consello Reitor da Fundación.