Vista sobre a prórroga da prisión provisional dos pais de Asunta

Os pais de Asunta, Alfonso Basterra e Rosario Porto, foron trasladados a mañá deste martes aos xulgados compostelanos para celebrar unha vista sobre a prórroga da situación de prisión provisional na que ambos os dous atopan dende setembro de 2013, acusados do crime da nena de orixe chinesa que adoptaran sendo un bebé.

O xornalista e a avogada atópanse na prisión de Teixeiro dende poucos días despois de que o cadáver da nena fose achado o 22 de setembro de 2013 nunha pista forestal de Teo (A Coruña), acusados de tramar un plan para matar a menor, que poucos días despois da súa morte cumpriría os 13 anos.

Ambos os dous atópanse á espera de xuízo, que está previsto que arranque o próximo 29 de setembro en Santiago, despois de que a constitución do xurado popular sufrise un atraso o pasado mes de xuño por falta de membros válidos para conformar o tribunal.

Non obstante, este martes o avogado da nai da pequena, José Luis Gutiérrez Aranguren, especulou con que “é posible que volva acontecer o mesmo na próxima selección (do xurado) e isto se repita no tempo”, polo que volveu reclamar a liberdade do seu cliente.

DOUS ANOS DE PRISIÓN PROVISIONAL

A nai de Asunta foi detida o 24 de setembro de 2013 e o pai o día seguinte (25), momento dende o que estiveron privados de liberdade. Ademais do cumprimento dos dous anos de prisión provisional, Aranguren subliñou, sobre o estado de saúde de Rosario Porto, que “conforme pasa o tempo sen tratarse, isto vai a maiores”.

“Faltan dous meses do cumprimento da prisión preventiva”, alertou o avogado, quen evitou aclarar cáles son os problemas exactos de saúde do seu cliente porque “é algo íntimo”, pero puntualizou que os seus argumentos son de peso. “Base entendo que a teño”, aseverou.

A Fiscalía pide 18 anos de prisión para cada un dos pais como coautores dun delito de asasinato, fronte aos 20 anos de cárcere para cada un que solicita a acusación popular, exercida pola Asociación Clara Campoamor. A petición da Fiscalía e da acusación popular, agora deberase resolver se se prorroga ou non da súa prisión provisional.

Os pais de Asunta foron trasladados este martes en dous coches da Garda Civil e chegaron aos xulgados compostelanos sobre as 10.06 horas. Os seus avogados solicitaron infrutuosamente en diversas ocasións a posta en liberdade dos seus clientes á espera de que chegase o momento do xuízo, unha petición que ata o momento foi reiteradamente rexeitada polas autoridades xudiciais.