Últimos días para participar no I Concurso Provincial de Tapas de Lugo

Co obxectivo de ampliar os eventos de promoción da gastronomía lucense e aproveitando a maior presenza de turistas que nos visitan no verán, a Asociación Provincial de Empresarios de Hostelería e Turismo de Lugo (Apehl) poñía en marcha, o pasado 10 de xullo, o primeiro Concurso Provincial de Tapas de Lugo, cuxo remate se producirá este domingo 26 de xullo.

Nesta primeira edición do certame compiten un total de 20 negocios hostaleiros: Cóndor, Río Lea e Suso, en Castro de Ribeiras de Lea; A Caseta da Barra, A Laxa, Arrocería Os Cachivaches, Brisay, Campos, Casa D´Auga, Curruncho A Nosa Terra, Paprica, Parrillada Antonio e Pulpería O Castelo, en Lugo; Bodegón A Catedral e O Rincón de Mondoñedo, en Mondoñedo; A Troula, El Convento e Enjoy Holiday, en Monforte de Lemos; Asador O Cabuxo, en Muimenta, e O Chanto, en Sarria.

O horario mínimo de degustación é de 13.00 a 15.30 horas e de 20.00 a 22.30 horas, inda que cada local poderá ampliar estes intervalos en función das súas posibilidades. O prezo das tapas sitúase entre 1 e 3 euros.