Turismo de Galicia promociona o golf co circuíto sénior

O campo de golf de La Barganiza, en Asturias acollerá o vindeiro día 16 de xullo a quinta proba clasificatoria do V Circuíto de Golf Sénior Turismo de Galicia, organizado polo departamento de promoción turística da Xunta de Galicia, e que este ano se celebra en seis comunidades autónomas.

Este torneo, no que participan homes de máis de 55 anos e mulleres de máis de 50, celébrase por quinto ano consecutivo e conta cunha fase clasificatoria que se desenvolve en cinco campos de golf doutras tantas comunidades autónomas españolas. A fase final terá lugar no campo de golf Oca Augas Santas Balneario Golf Resort, en Ferreira de Pantón os días 6, 7, 8 e 9 de outubro.

Canto á  fase clasificatoria, os campos e comunidade autónomas elixidos para a súa celebración ademais de La Barganiza, en Asturias, foron La Herrería, en Madrid, Golf Ulzama, en Navarra, que a acolleu a proba clasificatoria o día 12 de maio, oa  Real Club de Golf de San Sebastián, o 28 de maio e o Club de Golf de Pedreña de Cantabria, o pasado  9 de xullo.

Estas probas clasificatorias, nas que está previsto que participen uns 500 golfistas sénior, desenvolveranse pola modalidade de stableford scratch e hadicap individual e os xogadores que queiran participar deberán ter o cartón federativo en vigor na data da celebración da competición cun límite de hándicap de xogo de 26,4, para homes, e  36,4 para mulleres.

Plan integral de Turismo de Galicia

O Plan Integral de Turismo de Galicia ven reflectida a necesidade de impulsar a promoción e o apoio á organización de iniciativas de turismo deportivo para a captación de novos fluxos turísticos en tempada baixa, así como a creación de campionatos de golf vencellados ao turismo termal. 

Por iso, ata o ano 2016 estanse impulsando accións encamiñadas á promoción, á captación de máis turistas e ao establecemento de sinerxias con operadores nacionais e internacionais especializados no turismo de golf. 

Deste xeito, entre as actuacións máis salientables destacan a participación en feiras sectoriais de golf, accións de promoción en medios de comunicación especializados en colaboración coas empresas xestoras dos campos, a realización de eventos Green Day para participantes amateurs, o lanzamento de ofertas de fins de semana multiexperienciais combinando turismo de golf con turismo termal ou rural, o desenvolvemento de paquetes pechados que consten de Green Fee e clases de iniciación ou perfeccionamento realizadas por monitores propostos pola Federación Galega de Golf e a Asociación Galicia, Destino Golf; e tamén a creación de paquetes turísticos, ofertando golf, aloxamento, termalismo e gastronomía, especialmente para o colectivo sénior.