Semana do Folclore en Bueu con tres festivais de música e baile tradicional

Xa queda menos para a Semana do Folclore de Bueu. Mañá a Praza Massó comezará a soar coa música e o baile tradicional de grupos internacionais. En concreto, a partir das 22 horas, o Grupo Etnográfico da Boa Nova de Funchal, da Illa de Madeira, a Achterhookse Folkloredansers, da localidade holandesa de Ruurlo, e Trebeda de Marín serán os encargados de inaugurar  o Festival Internacional de Folclore.

O venres 24 de xullo será a quenda do Festival de baile tradicional Recordos, organizado pola Asociación Cultural Recordos da Nosa Terra, e no que estarán acompañados da Agrupación O Trevo, de Meis, e da Asociación Os Chaneiros, de Marín.

Por último, o día de Santiago péchase esta semana folclórica co XXI Festival Alborada no que a partir das 22 horas tocarán a Banda de Gaitas Manxadoira, de Bueu e Pelica de Can.

Todos os festivais terán lugar na Praza Massó.