Preconcedido un obradoiro de emprego para o Concello de Ferrol

O Concello de Ferrol informa que ten preconcedido -en fase de comisión de valoración- un obradoiro de emprego dirixido a todos aqueles mozos e mozas entre 18 anos e menores de 25 anos, ou ben, menores de 30 anos no caso daquelas persoas cun grao de discapacidade igual ou superior ao 33%.

Poderán acceder aqueles que estean anotados previamente no ficheiro do Sistema de Garantía Xuvenil, programas mixtos de emprego e formación para a mocidade (obradoiros de emprego de garantía xuvenil).

Para inscribirse no ficheiro do Sistema de garantía xuvenil, os interesados deberán dirixirse á oficina de emprego do edificio da Xunta de Galicia Ferrol-Centro no que dispoñen dun servizo de información e atención personalizada para realizar a dita inscrición, requisito imprescindible para participar neste tipo de programas. 

O Concello de Ferrol ten solicitado esta axuda á Consellería de Traballo e Benestar para a posta en funcionamento dun obradoiro de emprego de garantía xuvenil baixo a denominación de “Smart Ferrol”.