Os traballadores de Viriato votarán en referendo se aceptan 40 despedimentos na fábrica de Ordes

Os traballadores de Viriato votarán este xoves en referendo se aceptan os 40 despedimentos na fábrica de Ordes (A Coruña) que contempla o preacordo alcanzado polo sindicato CC.OO. (maioritario no comité de empresa) e a dirección da empresa a semana pasada. Para a CIG, que rexeita estas saídas, esta votación responde ao intento de Comisións por “lavarse a cara” despois da actitude mantida durante a negociación dun primeiro ERE en abril (que finalmente Viriato non chegou a executar) e deste segundo expediente.

A voceiro da sección de téxtil da central nacionalista, Dolores Martínez, criticou, que a compañía propoña “unha obscenidade” en relación ás garantías para cobrar as indemnizacións, xa que estas, explicou, baséanse en avais sobre propiedades que ten Viriato en A Coruña e “sobre as que pesa unha carga hipotecaria”.

Pero “o máis grave” para esta voceiro é que o sindicato maioritario no comité de empresa aceptara estas condicións, que deixarán aos traballadores que se irán despedidos nunha “situación de indefensión”.

A CIG, anunciou Martínez, vai impugnar este ERE, e avanza que un elevado número das persoas que serán despedidas no prazo dos próximos 15 días – os que ten a empresa para entregar as cartas de despedimento – tamén o farán, “a titulo individual”.

Ao respecto do referendo, que se desenvolverá entre as 13,00 e as 15,00 horas deste xoves, a sindicalista advirte de que “non hai peor mentira que unha media verdade”, xa que se agora se fai unha votación é “porque Comisións Obreiras aceptou o acordo”.

Así mesmo, acusa tanto a CC.OO. como á dirección de Viriato de levar a cabo unha campaña “de enfrontamento” no equipo, entre os que quedan e os que se irán, e “coaccións” para decantar a votación cara a o si, ao “ameazar” con que “ou é o ERE ou hai que ir á liquidación”. “E é absolutamente falso. Se a empresa continúa aberta é porque dá beneficios”, sentenza.

PREACORDO

O pasado xoves, na segunda reunión do período de consultas, CC.OO. e Viriato pecharon un preacordo que suporá o despedimento de 40 traballadores da fábrica de Ordes.

A CIG xa lamentou no seu día o “entreguismo” por parte de Comisións “na aceleración da sinatura deste acordo”. “Mesmo sen rematar o período de negociacións legalmente estipulado”, criticou.

A proposta final da empresa, segundo informou a CIG, consiste no despedimento de 40 traballadores. As sete persoas afectadas que teñen menos de 55 anos terán unha indemnización de 20 días por ano traballado (cun máximo de 12 mensualidades) e un complemento de 1.000 euros.

Pola súa banda, aos traballadores de entre 55 e 58 anos de idade garánteselle ata cumprir os 62 un complemento ás prestacións por desemprego ata chegar aos 800 euros ao mes e a manter o convenio especial ata os 62.

Para o persoal de 59 a 61, a compañía garante un máximo de 800 euros ao mes e o 70% na base de cotización, segundo os datos que achega a CIG.

Así mesmo, indicou que a empresa comunicou o “seu compromiso” de saldar toda a débeda salarial que ten cos traballadores a data do 5 de decembro deste ano.