Oito atletas da Sociedade Ximnástica logran a marca mínima para o nacional absoluto

A falta de 17 días para unha das citas máis importante do ano, o Campionato de España Absoluto, que se celebra o 1 e 2 de agosto en Castelló; até 8 atletas da Sociedade Ximnástica xa posúen a marca mínima esixida pola RFEA. Alberto Salcedo, que correu este ano a distancia de 200 metros en 21.41, este inverno conseguiu o título nacional de pista cuberta, aínda que o accidente que sufriu na segunda xornada de División de Honra, freoulle algo a súa preparación.

Alberto Guerrero está a sorprendernos gratamente. No Meeting de Madrid, correu en 1.48.38, con marca persoal e achégase á elite nacional dos 800 metros. Julián Ortiz, nos 110 metros valas, conseguiu rebaixar o pasado fin de semana a súa marca persoal, até 13.97 segundos.

Ignacio Sarmiento aínda non correu este ano os 400 metros valas en 50 segundos, un rexistro moi complicado, polo momento no pasado Meeting de Madrid, parou o crono en 51.30.

Lysvanys Pérez e Manuel Muíños estarán no salto de altura, aínda que Lysvanys tamén tentará conseguir a marca de clasificación no triplo salto. Lysvanys atravesa un gran momento de forma, mentres que Muíños xa está case recuperado dunha escordadura de nocello que tivo a finais de xuño.

Víctor Gallego é un dos fixos da Ximnástica, nos últimos anos, na proba de lanzamento de disco, tivo uns meses de abril e maio moi complicados con lesións que lle impediron render co equipo do Ximnástica pero agora atópase con ganas de mellorar a súa marca persoal.

Rocío Rodríguez é outra atleta que está a sorprender gratamente, leva un mes mellorando a súa marca persoal cada fin de semana. Non quedaba outra que conseguir a mínima nacional e de seguro fíxoo no pasado Trofeo Cidade de Vigo, cun rexistro de 4.33.02, nos 1.500 metros.

Aínda hai que esperar xa que a estes atletas pódenselle xuntar algún máis como Gonzalo Sánchez, outro Ximnástico, que hai unha semana quedou a unha décima da mínima nos 100 metros e que tamén sufriu o seu contratempo en modo de lesión muscular, que lle impediu estar na nacional promesa, a primeiros de xullo.

Eduardo Gallardo empezou o mes de xullo correndo en 48.73 os 400 metros; a RFEA esixe 48.00, aínda está algo lonxe pero está a buscar esa carreira que lle achegue a devandita marca.

Emilio Martín asinou 14.06.63 nos 5.000 metros, do pasado Meeting de Huelva, pode acceder ao nacional coas prazas de invitado que proporciona a RFEA, pero o próximo fin de semana tratará de baixar dos 14 minutos en Nerja, para non ter que esperar á repesca.

David Martínez con 3.47.45 este ano nos 1.500 metros, fáltalle un segundo para estar en Castelló, esperemos que o consiga.

David Ferrer e Mario Álvarez, con 7,20 metros, necesitan 20 centímetros máis para conseguir praza na proba de salto de lonxitude, esperemos que o próximo fin de semana sumen esa distancia.

Con 64,20 metros na xavelina, o junior Manuel Castellanos está máis preto dos 65 metros que esixe a RFEA; polo momento xa ten feita a súa tempada, esa marca deulle o subcampeonato no nacional junior e se chega a Castelló será a guinda do pastel.

Non hai que esquecer tamén da substitución 4×400, coa Ximnástica clasificada de novo; estes días a dirección técnica do equipo pontevedrés está a pechar o cuarteto que acuda a Castelló, un cuarteto con garantías de poder atacar o record de Galicia da especialidade.