O porto de Vigo abre as súas instalacións a unha vintena de empresas transitarias

Unha vintena de responsables de empresas transitarias visitaron esta mañá as instalacións do Porto de Vigo, onde estiveron acompañados polo Presidente da Autoridade Portuaria, Ignacio López-Chaves, quen lles explicou as características das infraestruturas e instalacións da dársena olívica.

Tras unha breve presentación, López-Chaves acompañou á comitiva na súa visita, exercendo de anfitrión fronte aos responsables do transporte internacional de mercadorías ou, como el mesmo explicou en declaracións aos medios, intermediarios entre o exportador ou importador e as compañías de transporte. Unha figura imprescindible e “moi importante” dentro do Porto de Vigo, xa que é quen organiza o enlace entre os distintos transportistas e asegura a continuidade do transporte da mercadoría a través de distintos medios de transporte, ademais de ser o responsable das operacións administrativas relacionadas co transporte internacional.

Por iso, o máximo responsable portuario quixo ofrecer aos transitarios unha “visión global” do Porto, para o que expuxo aos asistentes a contorna no que se asenta, dentro da eurorrexión Galicia-Norte de Portugal e a macrorrexión do suroeste europeo, centrándose especialmente no que supón a cidade de Vigo e o resto da súa zona de servizo, cun total de 22 km. de liña de costa portuaria e aproximadamente 3 millóns de m2 de zona terrestre dividida en cinco municipios (Vigo, Redondela, Moaña, Cangas e Vilaboa). 

Segundo indicou López-Chaves, o de Vigo é “un porto xeral contenerizado, altamente cualificado, versátil, natural, seguro e fiable”, cuxo tráfico portuario superou os 4 millóns de toneladas en 2014, das que 3,4 millóns de toneladas fan referencia á mercadoría xeral. “O valor industrial desta mercadoría -salientou- supuxo máis de 11,4 millóns de euros” e, só no capítulo de exportacións, o valor da mercadoría ascendeu a máis de 6.300 millóns de euros ao longo do pasado exercicio, o que dá boa mostra do carácter esencialmente exportador do Porto de Vigo. “Polo Porto de Vigo salguen máis de 40% das exportacións totais de Galicia e o 22% das importacións e é, ademais, a 6ª cidade exportadora de España”, destacou.

Neste sentido, afirmou que Vigo ocupa o primeiro posto en tráfico de pesca fresca e granito, o 2ª en vehículos novos, o 4º da Península en colectores de importación e exportación (sen transbordos), o 5º en pasaxeiros de cruceiro, o 8º en tráfico de colectores (con transbordos) e o 9º en mercadoría xeral.